Gijgwn feih lumj daengngoenz hoengzswgswg, raeujrub aen sim raeuz; gijgwn feih lumj naed siendan, daiq vaiqvued daeuj hawj raeuz; gijgwn feih lumj mbaw youzbiu he, geiqdak gij cingz niemh mbanjranz.

Mbanjranz gou gij fwen ndeidingq lumj goengqbya lienzrangh, sam ngoenz sam hwnz eu mbouj liux, gij gingjgyaeu caemh yawj hix yawj mbouj gvaqdoh. Youq gizdieg neix, dangyienz noix mbouj ndaej gijgwn feih lo.

Haeuxnaengj haj saek ndaej suenq baiz daih’it. Haj cungj saek: Hoengz、henj、 aeuj、ndaem、hau, biujyienh Bouxcuengh raeuz saedceij lai saek lai yiengh, vuenyungz dangqmaz. Daengz ngoenzciet roxnaeuz ngoenzndei, gyagya hohhoh cungj caengq haeuxnaengj. Geiq ndaej yaek daengz sam nyied sam, daxmeh couh caeuq geij mehsimj doxiu bae haw cawx mbawraeu, cawx vamai roxnaeuz rungzgei, bae ndawsuen gvej go’gyaemq. Daxmeh dawz goraeu lienz mbaw lienz ganjfaex raemj baenz capfwngz raez, dwk roengz aen rum bae yungh sak daem mienz. Gij saek ndaem aeu cimqraemx gonq, yawj daeuj gig mazfanz, hoeng haeuxnaengj ndaem ceiq rang. Mbawgyaemq、vamai swiqcengh, ndawrek dwkraemx le, dawz gij doenghgo neix baez yiengh cawj goenj, yawjraen raemx bienq saek le, caiq cawj geij faencung cij dingz feiz, dawz nyaq doenghgo vax hwnjdaeuj yaemz bae gij cazciz, aeu gij raemx de daeuj cimq haeuxcid, yaek cimq baenzngoenz, caj gij haeux bienq saek le vax hwnjdaeuj sak raemx.

Daxmeh hawj gou caeuq de dawz haeuxcid haj cungj saek cuengq roengz ndawcaengq, baij dozanq dwk. Caengq haeuxnaengj mbouj yungh meizgi, aeu cauxfeiz, caen mbouj genjdanh, yaek caengq song sam diemjcung. Seizneix, heiqhom gyuem daengx ranzdajcawj liux, gou linx yaek doekhoz youq henz caengq gvaxlili, cam:“Daxmeh, haeuxnaengj cug mbouj caengz？Gou dungxiek yaek dai lo! Mup raen heiqhom lo, lij caengz ndaej gwn ma?” Daxmeh riuhaha naeuz:“Lwg ngah neix ya, haeuxnaengj caengq nanz di cij unq cij rang!” Muengh dwk hoz lot, daxmeh gwet fa caengq lo. Va! Fwi ndat- foedfoed, heiqhom rim ndaeng, haj cungj saek rongh gyaeu dangqmaz. Gou vaiq aeu fag canj daek haeuxnaengj roengz vanj bae, caj di couh aeu fwngz baenj baenz aengiuz haeuxnaengj haj saek, lij ndat lai, gou doq baenj haeuxnaengj doq hemq:“Ndat! Ndat! Ndat……” Daxmeh raen neix dawz haeux- naengj banj haeuj fajnaj gou, maengxgokgok naeuz:“Yawj mwngz ha, caen ngah haeuxnaengj lo, hawj naj mwngz caemh gwn di haeuxnaengj cij ndaej.” Daengx ranz yawj raen fajnaj gou nem haeuxnaengj dwk, daihgya riu dwk dungxin bae.

Daengz haeuxcaeuz, nohbit、 nohgaeq、 nohbya、gouyuz、gungq daengj fungfouq dangqmaz, baij rim gwnz daizbyaek. Geij beixnuengx geij ranz vunz comz youq itheij, doq gwn doq cejgoj, gyoengq lwgnyez geijlai nauhyied, gaemz haeuxnaengj, gaemz noh caiq ndoet gaemz gojloz, mbangj lwg gwn ndaej gokbak youzywdywd, haeuxnaengj nem bak lumj najmeuzva.

Mbanjranz gou gijgwn feih lijmiz haujlai, dangzhaeuxsae、 ceizfouq、 faengx、 caqfaenj daengj, ciengx daih dem daih Bouxcuengh lwgminz, hawj saedceij raeuz gvaq ndaej engq vuenyungz.

(Nanzningz Si Vujmingz Gih Daibingz Cin Gingloz Siujyoz roek nienzgaep Vangz Danh- yangz boux lauxsae son’gyauq Vangz Cunhgiz)