（ciep geizgonq）

14 Duzvanh Ngeizvaeg

“Bae yawjyawj giz dem.” Nyaenma sienseng haenqrengz gangj.

“Gou gamj doj, giz haenx dwg gizlawz.” Duz nyaenma lwg louz roengzdaeuj haenx naeuz, de dwg sam duz nyaenma lwg ndawde duz ceiq iq.

“Dwg gizlawz?” Duzvanh cam.

“W,” Duz nyaenma ceiq iq naeuz, “raeuz bae giz Bozgizswh haenx gvaq, goj bae giz Banghswh haenx gvaq, hoeng caengz bae giz Bijwnh gvaq.”

“Mwngz gangj deng lo,” Nyaenma sienseng naeuz, “hoeng mwngz mbouj rox raeuz yaek bae giz Bijwnh lawz.”

“Gizlawz?” Song duz de doxcaez cam.

“Haha,” Nyaenma sienseng naeuz, “sou couh caj yawj lo.”

Gyoengqde doq gangj doq vat, deihgoengq gig vaiq iet gvaq baihnaj bae.

Duzvanh sawqmwh naeuz: “Beix nyaenma, mwngz mbouj vih neix raen you saekdi ha?”

“You?” Nyaenma sienseng naeuz, “vihmaz you?”

“Sojmiz doenghgij …… doenghgij hingzveiz caeg’aeu neix……”

Nyaenma sienseng dingz roengzdaeuj mbouj vat lo, song da sej yawj duzvanh, lumj lau ngawz liux nei. De naeuz: “Mwngz boux mbouj rox bienq moq neix, mwngz rox daengx seiqgyaiq miz bouxlawz youq mwh lwg de yaek iek dai, goj mbouj caeg saek duz gaeq?”

Duzvanh youq mwh ngeixnaemj haeujlaeg, miz yaep ndeu caemdigdig. “Mwngz caen hawj vunz gingqcungh lai lo!”

Nyaenma sienseng naeuz: “Hawj vunz gingqcungh mbouj miz loek ni?”

Duzvanh naeuz: “Yawj.”