Gyanghaet, mwh geu ndit daih’it ciuq haeuj conghcueng, gou cwxcaih ietnonx mbat ndeu, hai lwgda mumjgyumq, yawj- raen daxbuz ninz youq gwnz eijngauz, daiq aen nganxciuq dava, ndawfwngz biengj cek siengq gaeuq ndeu. Gou byaij gvaqbae, caeuq daxbuz doxcaez dinghdingh yawj mbawsiengq. Mbawsiengq aen ranz gaeuq ndeu ciuyinx gou lo: Yiemhranz daemqded, gepvax ndaemndwt, gwnz ciengq dazcaengz hoihau ndeu, miz mbangj giz gaenq loh’ok gepcien, gwnzcien maj rim ngawhrin, henzcueng miz baenz loh baenz loh lohdek, lumjbaenz yaengyaeng bungq couh doek roengzdaeuj, aendou iq raizngau mbouj raeuz lo. Gou geizheih dwk cam daxbuz: “Aen ranz neix dwg aenranz ranz lawz? Youh iq youq nyauq.”“Aen ranz neix dwg daxboh mwngz mwh iq youq, dwg goenggeq caeuq goeng mwngz song boux sinsin hojhoj dajgoeng haujlai bi, youh caeuq caencik ciq di cienz cij caep hwnjdaeuj. Mwhde goengngeih、goengsam、buzngeih daengj bet gouj boux vunz cungj youq gizneix youq, gou caeuq boh mwngz goeng mwngz sam boux baen ndaej aenranz iq mbiengj baihdoeng. Dou dajcawj、dajswiq、yietnaiq cungj youq aen ranz iqet neix, gyanghaemh sam vunz caenx youq aenmbonq benjfaex ndeu, fan ndang cungj dwgrengz.” Daxbuz menhmenh dauqngeix, “Miz baez ndeu, boh mwngz cuengqhag maranz dungxiek raixcaix, hoeng aencauq aeu giuzmeiz cawj haeux daegbied menh, boh mwngz caen iek dahraix lo, couh fatheiq nauh daej, gou couh fak de mbat ndeu! Ai, maj baenzneix hung, gou cij moeb de baez ndeu, gvaqlaeng siengj- siengj cungj nanzgvaq ndaej doek raemx- da, neix gizlawz dwg lwgnyez loek ha, dwg ndawranz hoj lai, saedceij gvaq mbouj ndei, heiq cungj fat youq gwnz ndang lwgnyez……” Daxbuz yawj coh rogcueng, menhmenh gangj. Gvaq yaep ndeu, daxbuz ngeux gyaeuj gvaqdaeuj naeuz: “Seizneix ndei lo, guekgya maenh’ak, miz ranz hung youq, mbouj you gwn mbouj you daenj, loh gvangq doeng daengz mbanj, baedauq fuengbienh, saedceij beksingq ngoenz beij ngoenz ndei lo!”

Dwg ha, guekcoj raeuz ngoenz beij ngoenz ak, yienznaeuz seizneix lij caengz yienghyiengh guh daengz seiqgyaiq daih- it, hoeng raeuz vunz Cungguek roengz- rengz gaenxguh, haeuxgwn gag guh gag gaeuq gwn, lij gag yenzgiu haifat daujdan、hangzmuj caeuq ginhgen daeuj henhoh guekcoj caeuq yinzminz. Raeuz baengh gij cingsaenz mbouj fugsaw, cauhlaeb ok aen youh aen mbouj bingzciengz, hawj gwnz seiqgyaiq gij guekgya wnq cungj dadaengx bae.

Geij bi neix daeuj, raeuz leihyungh doxgaiq、gingjsaek daswyenz daengj daegsaek swhyenz lajmbanj, dwk hingz ciengz ciengq gunggeng duethoj, “vunz- vunz miz haeux gwn, vunzvunz gvaq hwnj saedceij vuenyungz”mbouj caiq dwg loq fangzhwnz lo.

Seizdaih cingq baenaj, guekgya cingq hwngfat, guh boux hagseng seizneix, gou aeu “saedyienh song aen bakbi” guh muzbyauh bae haenqrengz guh, laebdaeb roengzrengz doegsaw, caeux di baenz bouxvunz doiq guekgya mizyungh ndeu!

(Gyanghsuh Swngj Nanzcungh Si Yuzbu Si Giujvaz Siujyoz haj nienzgaep Lij Swjsenh)