（ciep geizgonq）

“Lij miz lauxbaeg nding, daxboh.” Sam duz nyaenma lwg ndawde duz ceiq iq haenx naeuz, “gij lauxbaeg nding haenx raeuz aeu di ndeu.”

“Gaej ngawz lo.” Nyaenma sienseng naeuz, “mwngz rox, raeuz seizlawz gwn gij neix gvaq.”

“Mbouj dwg raeuz gwn, daxboh. Dwg aeu hawj duzdouq gwn, gyoengqde dan gwn byaek bw.”

“Caen bw! Mwngz gangj ndaej deng.” Nyaenma sienseng okrengz gangj, “caen dwg duz lwg maij doengh uk ndeu. Aeu cib aen lauxbaeg nding.”

Sojmiz doenghgij huq hingz ndaej ndeigyaez neix, gig vaiq couh cingjcingj caezcaez doi youq gwnz deihbanj baenz dong ndeu. Gyoengq nyaenma lwg doxcaez maeuq youq gizhaenx, aeu ndaeng nyouq, lwgda lumj ndaundeiq ronghyabyab.

Nyaenma sienseng naeuz: “Seizneix raeuz lij aeu caeuq baengzyoux raeuz Banghswh ciq doenghgij cigaex mizyungh haenx. Couhdwg gij cuengq youq gokciengz haenx.”

De caeuq duzvanh aeu cigaex gvaqdaeuj lo. Liuxle, bit、hanq、galab caeuq nohmou lab, cungj deng cang hwnj gwnz cigaex bae, gyoengqde gig vaiq daj aen congh gwnz deihbanj haenx gaex cigaex roengzbae. Gyoengq doenghduz goj riengz cigaex ndonj roengz congh bae. Nyaenma sienseng dauqma daengz ndawcongh le, youh gig sijsaeq dwk dawz geij gaiq faexbenj rag roengzdaeuj cuengq haeuj giz gaeuq bae, yienghneix couh mbouj miz vunz yawj ndaej ok de deng doengh gvaq. Nyaenma sienseng ceij sam duz nyaenma lwg ndawde song duz naeuz: “Gyoengq lwg ndei, sou duz gaex aen ndeu, vaiqdi buet bae giz daxmeh sou youq haenx, bang gou cam de ndei. Lwnh de, raeuz miz hek daeuj gwnhaeux. Bouxhek miz duzvanh、duzoenj、duzdouq caeuq duz nouguk. Naeuz de, dou geij duz louz roengzdaeuj neix guh sat gienh saeh iq wnq, sikhaek dauq ranz.”

“Ndei, daxboh! Sikhaek couh bae, daxboh!”

Gyoengqde han naeuz, liuxle moix duz gag gaex aen cigaex ndeu, riengz deihgoengq riengjvaiq buet deuz.