Miz ngoenz ndeu, baengzyoux gou heuh gou bae rod hanbingh, gou daenj gouh haiz hanbingh daxmeh bang gou ciq ma couh haidin lo.

Ngamq hainduj, gou yawjraen baengzyoux gou rod ndaej raeuzrad youh riengjret, gou hozhaenz lai lo, gou hix hag hwnjdaeuj, hoeng gou ngamq yo din caengz ndwn onj couh laemx lo, bungq daengz gahoq bae, youh in youh manh, lumj diuz ganggin camz haeuj nei, in hawj gou siengj daej youh mbouj gamj daej, gou mizdi mbouj siengj lienh roengzbae lo. Seizhaenx gou yawj bouxwnq rod, bouxboux rod ndaej raeuzrad riengjret, gou siengj gyoengqde seiz ngamq hag hix itdingh laemx gvaq haujlai baez, cijmiz mboujlau in, itdingh hag ndaej rox.

Yienghneix gou hainduj yawj gij vunz rox rod haenx, gyoengqde lumj byaijloh nei， baez yamq baez yamq byaij coh baihnaj, hawj aen ndangdaej bingz, gij vunz rod ndaej vaiq haenx ndang lij goz coh baihnaj, couh rod ndaej gig vaiq lo. Yienghneix gou fuz lanzgan, gig siujsim byaij dwk, hawj ndang bonjfaenh bingz, ngamq buet geij yamq couh laemx lo, bungqsieng gencueg, in dwk gou haebheuj ajbak, hoeng gou mbouj fugsaw, youh ndwn hwnjdaeuj, menhmenh yamqdin, doeklaeng gou cigciep mbouj fuz lanzgan lo, gou cij raen, mbouj fuz lanzgan beij fuz lanzgan byaij engq onj lai, ndigah gou cuengqhai fwngz, yamqdin rod baenaj, menhmenh dwk aen ndang bingz lo, gou engqgya daihdamj dwk rod baenaj, yied rod yied vaiq, baengzyoux gou raen le, doiq gou iet fwngzmeh naeuz：“Cinbu lai lo，gyayouz.”Gou dingq le，haisim dwk riu lo.

Lienh le buenq ngoenz, gou dauqdaej hagrox lo, mboujdan youq diegbingz rod ndaej, vanzlij youq gwnzbo rod ndaej, lij mbouj laemx ne, caen yungzheih ha!

Gwnzbiengz mbouj saehnanz, caenh lau boux miz sim. Gou doeng- gvaq roengzrengz lienhhag, hagrox le rod hanbingh, gou haisim raixcaix!

(Sanglinz Yen Dafungh Cin Cunghsinh Hagdangz seiq nienz- gaep Cinz Cihsan boux lauxsae son’gyauq Mungz Cwngzgen)