bouxraiz Lozwjdwz·Dazwj bouxhoiz Cwz Fanghdingz

罗尔德·达尔 著 翟芳婷 译

（ciep geizgonq）

Gwnz seiq faj ciengz aen ranz- hung neix, miz geij aen ringj, caeuq aen gyaq cang huq daj deihbanj sang daengz denqbungz, ndaw ringj caeuq gwnz gyaqhuq doi dwk baenz cien baenz fanh duz bit caeuq hanq ceiq ndei ceiq biz、gaenq loek bwn caj gang. Caemhcaiq gwnzliengz lij hoij dwk ceiq noix miz baenz bak aen galab caeuq hajcib diuz nohlab.

“Hawj da imq gonq ba,” nyaenma doq okrengz gangj, doq diuq bae diuq dauq, “mwngz raen baenzlawz yiengh, w? Gij doxgaiq ndeigwn dangqmaz.”

Sawqmwh, couh lumj gij danz- vangz ndaw ga gyoengqde rungq ok nei, sam duz nyaenma lwg caeuq duzvanh iek lai diuq hwnjbae, ciengj aeu gij gwn ndeigwn haenx.

“Daengx fwngz,” nyaenma sienseng minghlingh naeuz, “dwg gou banh hoihlaeuj, ndigah aeu gijmaz doxgaiq wngdang youz gou daeuj senj.”

Yienghneix, gyoengqde doq riz gij ndoksengh ndaw fwngz, doq doiq dauqma.

Nyaenma sienseng hainduj youq ndaw cang yaeg’yomj byaij bae byaij dauq, aeu cungj ronghda boux cien’gya ndeu bae saemjyawj doenghgij huq baij ronghgyaeu neix, diuz myaiz lumj diuz sei raez ndeu daj lajgangz de mbiengj ndeu lae roengzdaeuj, hoijnangnang, liuxle sawqmwh doek roengz gwnzdeih bae.

“Raeuz gaej guh gvaqbouh lai,” de gangj naeuz, “baenzlawz cungj mbouj ndaej laeuh dinmax, itdingh mbouj ndaej hawj gyoengqde rox raeuz daeuj gizneix gvaq. Raeuz itdingh aeu guh ndaej sawsak, dan aeu gij doxgaiq yunghsim senj okdaeuj bae couh ndaej lo. Ndigah raeuz haidaeuz couh aeu seiq duz bitbiz iq ndaej lo.”

De daj gwnzgyaq aeu doxgaiq roengzdaeuj.

“Yo, caen biz bw, gvaiq mbouj ndaej Banghswh youq gwnz haw- ciengz gai ndaej gyaqcienz ndei!”

“Ndei lo, beix vanh, bang gou mbat ndeu, de goj aeu roengzdaeuj. Gyoengq lwgnyez goj gvaqdaeuj bang di ndeu! Raeuz gvaq mbiengj haenx bae. Ai, yawjyawj gij myaiz sou, seizneix……Gou siengj, raeuz aeu geij duz hanq no? Sam duz couh doh lo. Raeuz aeu duz ceiq hung. Gangj caen, mwngz youq ndawranz dajcawj duzvuengz, goj mbouj gojnaengz raen gvaq duz lawz ndei gvaq doenghgij hanq neix bw. Yomj di ndeu, couh yienghneix. Caiq aeu geij aen galab baenzlawz yiengh? Gou ceiq maij galab, mwngz ni? Beix vanh, cingj mwngz aeu aen lae haenx daeuj hawj gou.”

Nyaenma sienseng benz hwnj lae, ndenq roengzdaeuj sam aen galab hung.

“Beix vanh, mwngz maij nohmou lab mbouj?”

“Gou maij nohmou lab lai lo!” Duzvanh doq okrengz gangj, doq faengz dwk diuq bae diuq dauq.

“Raeuz aeu gaiq nohmou lab ndeu no, baihgwnz gaiq ceiq hung haenx.”