Ranz gou gungh miz 5 boux vunz.

Daxboh dwg saeumeh ndawranz, de yienznaeuz mbouj sang, hoeng ndang cangqcwt. Daxboh dwg boux vunzguhnaz gaenx ndeu, duzmou de ciengx hung’hwd, duzma de ciengx rox hendou, mbouj hawj vunzseng haeuj ranz.

Daxmeh dwg bouxdajcawj ndawranz, hix dwg boux vuengz ndawranz, byaek de cauj hom raixcaix, ndoksej nohvaiz cungj rox cauj. Hawj de guenj engq lau lo, daenj buhvaq gijmaz、geij diemj bae lienhndang、bae diengzhaex cungj dingh ndei.

Gou dwg boux haisim ndawranz, seizseiz daiq angqyangz daeuj hawj ndawranz. Miz baez ndeu daxboh daiq gou bae dwkset, hoeng dwk byonghngoenz lijdwg mbouj dawz bakset saek duz, gou caeuq daxboh naeuz, daxboh raeuz caeu raemx ndawdaemz okdaeuj liux ba, yienghneix couh miz bya lo. Daxboh angqyangz dopfwngz riuhaha, doeklaeng gou caeuq daxboh doxcaez bae cawx geij duz bya, daxboh caeuq gou naeuz mbouj ndaej lwnh daxmeh, neix dwg gij mimiz song bouxsai.

Daxgoeng dwg boux nyezmanzgeq ndawranz, gyaez dingq ciengq go dwkgeiz caeuq dwkset, saeh daxgoeng ceiq gyaez guh, dwg dwkgeiz. Ngoenz ndeu, daxbuz heuh daxgoeng okbae cawx youz, daxgoeng baez okdou couh raen miz vunz cingq dwkgeiz, sikhaek couh lumz cawx youz bae yawj dwkgeiz lo. Daengzlaeng lij naengh roengzbae dwk dem, daengz banringzgvaq cij dauqranz, daxbuz cam:“Youz ne?” Daxgoeng mwnh lo：“Youz? Gijmaz youz?”

Daxbuz caeuq daxgoeng suenq doxlumj, hoeng mbouj gyaez dwkset caeuq dwkgeiz, daxbuz dwg boux nyezmanzgeq ndeu, hix dwg bouxganqva maenhndei, de gyaez youq gyang bingzva ndawranz ndaem geij go vabeghab, bae ndoi ndaem geij go faexiq, caezgya heuh de guh bouxhenhoh vanzging.

Ndawranz gou lijmiz duz ma ndeu, de gyaez gwn hix gyaez baujhoh ranz dou, dwg bouxhendou ndawranz. Ngoenzneix, dou doxcaez ingjsiengq gwnhaeux guhcaemz, daxgoeng dingq ciengq go caeuq daxbuz doxcaez diuq foux, gou caeuq duzma loengh bizgiuz, daxboh daxmeh cingq cawj haeux, feih homfwdfwd, hawj vunz myaiz rih. Gou sawqmwh raen, gou yiengjsouh gij ndwenngoenz caeuq vunzranz doxcaez youq raixcaix.

(Gveigangj Si Dunghhuz Siujyoz roek nienz- gaep Ciz Cwngzhau)