Gyanghongh ranzlaux gou miz govaiz laux ndeu.

“Daxgoeng, de caen caeuq gou ityiengh hung lwi？ Hoeng vihmaz de sang gvaq gou baenzneix lai ha?” Doxgoeng riu lo, lumh gyaeuj gou naeuz：“Gizsaed de hix mbouj sang geijlai, dwg mwngz ngiengx gyaeuj yawj cij yawj sang, mwngz aeu vuenh dieg yawj.” Daxgoeng vix govaiz naeuz, “de yienznaeuz sang gvaq mwngz, hoeng byom gvaq mwngz.”

Raq rumz baed gvaq, govaiz doenghngeungeu, miz sing ndeidingq, lumjbaenz cingq riu gou. Ndit ciuq daengz gij mbaw caxcadcad, ngaeuzfaex raizbanq ingj daengz gwnz ciengznamh, lumj fukveh maeg nei.

Baez ndeu, aenvih doxdax raiz faenzcieng gou mbouj ndaej ciengj, gou doeknaiq raixcaix, mbwn hix yaemyetyet, hawj gou diemheiq cungj hoj. Yienghneix gou couh dauqbae ranzlaux ra daxgoeng. Ngamq daengz gyanghongh, raen govaiz laux youh sang lo, hix bienq hung lo, gij mbaw gwnz ganjfaex hix lai lo. De heuswdswd, hoenghfwdfwd.

Sawqmwh, byajmig mbat ndeu, riengzlaeng, byajraez rumrum. Doek fwn lo！ Ndik ndeu、song ndik……Yienzhaeuh doek fwn hung, raemxfwn daj yiemhranz lae roengzdaeuj lumj raemxdiuqdat nei ndeiyawj. Govaiz gyanghongh youq gyang fwn daengjsoh、ngiengx gyaeuj dwk, youzcaih raemxfwn doek roengzdaeuj, mbouj lau saek di. Rumz lumj duzguk duznyaen rongx nei, baed ganjfaex de. Hoeng neix hawj de bibuengq ndwi, mbouj hawj de laemx ndaej.

Ndawranz, gou rag gakbuh daxgoeng naeuz：“Daxgoeng, de yaek laemx lo, raeuz bae bangbang de ba?” “Lwg huk ha, mwngz cuengqsim, fwn rumz dongj mbouj laemx de. Cijmiz ginggvaq fwn rumz, de cij ndaej maj baenz gofaex dahraix, cij ndaej laebdaeb majhung, maj ganj maj mbaw.” Daxgoeng maeuq roengzdaeuj, yawj gou, menhmenh naeuz.

Rogcueng rumz engq haenq lo, fwn hix engq hung lo, govaiz bibuengq engq haenq lo, lumjbaenz aen ruz iq youq ndaw raemxlangh bibuengq mbouj dingh, hoeng de cungj mbouj laemx.

Fwn dauqdaej dingz lo, raq rumz baed gvaq, govaiz gyaeuqgyaeuq raemxfwn gwnzndang, lijdwg daengjsoh. Gou sawqmwh rox lo：Caeuq govaiz doxbeij, gij daemdengj iqet gou bungz daengz neix suenq gijmaz ne? Gou nyeux gyaeuj yawjyawj daxgoeng, daxgoeng coh gou riunyumnyum ngaek- ngaek gyaeuj.

Seizneix gou majhung lo, lijdwg gyaez govaiz. Mwh gou majhung miz govaiz buenx, ndwenngoenz gou angqyangz lai.

(Gyanghsuh Swngj Bihcouh Si Dujsanh Cin Sezciz Siujyoz Lij Cinyij)