Baeznaengz daengz gvaq ciet, ranz dou gyaez doxcomz gwn haeux. Mwh gwn haeux couh dwg mwh caezgya lwnh gojgaeq. Ngoenzneix dwg doengceiq, caezgya youh doxcomz gwn haeux lo.

“Dingzdingz, lajlaeuz ranz mwngz couh miz hagdangz, fuengbienh lai lo, mwngz vuenyungz lai!” Bohnax naengh baihnaj gou naeuz,“mwngz rox gou caeuq daxmeh mwngz gaxgonq baenzlawz bae hagdangz lwi?”

Daxmeh ciep naeuz：“Seizneix mbouj lumj doenghbaez, gvaq haujlai bi lo, doenghgij saeh gou bae hagdangz lij geiq ndaej cingcing cujcuj.” Couh yienghneix, caezgya couh mwngz coenz gou coenz.

Bohnax gikdoengh naeuz：“Mwh gou doeg siujyoz, ngoenznaengz aeu byaij roennamhsa bae hagdangz. Ngoenz- gvengq moekmoenq mbinfoenfoen, ngoenzfwn roen boengzhomq, baez byaij couh dwg seiq goengleix, baedauq aeu byaij cib geij goengleix gyae.”

Daxboh naeuz：“Mwh gou doeg siujyoz, daj ndawranz daengz cungsim hagdangz gwnzhaw miz bet gouj goengleix, ngoenznaengz ranz caengz rongh couh aeu hwnq mbonq, roenbya ngutngut ngeungeu, mbouj siujsim couh deng doek dat.”

Daxdaiq danq naeuz：“Gyoengqsou ceiq noix lij ndaej bae hagdangz, mbouj lumj gou, doeg daengz ngeih nienzgaep couh mbouj doeg cix dauqma ranz guh reihnaz lo, ndigah seizneix gou couh dwg boux vwnzmangz mbouj rox saw rox sa.” Gangj daengz neix, daxdaiq raemxda doek lo.

Daxmeh naeuz：“Raeuz gaenq byaij gvaqdaeuj lo. Seizneix lwgnyez raeuz bae hagdangz mbouj yungh you lo! Dangj caeuq cwngfuj saedhengz gij cwngcwz yivu gyauyuz、youq gyawj haeujhag, hawj haujlai lwgnyez ndaej youq bakdou ranz hwnjhag、ndaej bae hagdangz ndei. Seizneix cwngfuj doihengz ‘song gemj’ cwngcwz, hagseng atlig bienq mbaeu, ngoenz- naengz mbouj you hag, hawj hagseng sim ndang cangqheiq, hawj engq lai hagseng ndaej guh gij saeh bonjfaenh naemj guh.”

Dingq le gij vah caezgya, gou roxnyinh bonjfaenh caen vuenyungz lai lo, ndaej bae hagdangz ndei doegsaw, gou lijmiz maz leixyouz mbouj ndeindei bae hag ne?

(Nanzningz Si Sihyanghdangz Siujyoz Linz Vanjdingz)