（ciep geizgonq）

13 Aen Canghung Banghswh

“Beix nyaenma ndei gou,” duzvanh okrengz naeuz, “diuz rieng mwngz dauq- daej dwg baenz gijmaz ni?”

“Cingj mwngz gaej dwen lo.” Nyaenma sienseng naeuz, “neix dwg gienh saehcingz hawj gou sim’in ndeu!”

Gyoengqde cingq vat diuz deihgoengq moq ndeu, daihgya cungj roengzrengz vat, mbouj gangj saek coenz vah. Duzvanh vat congh ak raixcaix, deihgoengq vat vaiq dwk hawj vunz doeksaet, yaepyet couh iet ok baihnaj bae raezrangh lo, lij miz mbat nyauj dem couh doh lo.

Gyoengqde gig vaiq couh maeuq youq baihlaj gaiq deihbanj faex linghvaih.

Nyaenma sienseng riugan, gij heuj- hau soemraeh de conh okdaeuj, naeuz: “Danghnaeuz gou gangj mbouj loeng, beix vanh, raeuz dwg youq aen canghung fangz Banghswh oepsoep daemqdet、dungx bongz haenx, saedcaiq ma gangj raeuz cingq youq baihlaj bouhfaenh ceiq mizyinx ciengz dajciengx neix.”

“Bit caeuq hanq.” Duz nyaenma lwg doq riz bak doq gangj naeuz, “bitoiq caeuq hanq youh hung youh biz bw.”

“Mbouj loeng saekdi.” Nyaenma sienseng naeuz.

“Hoeng mwngz guhlawz gingqyienz rox raeuz youq gizlawz ni?” Duzvanh cam.

Nyaenma sienseng youh mbe bak riuriu, heujhau conh okdaeuj engq lai, de naeuz: “Youq seiqhenz doengh aen ciengz dajciengx neix, gou couhcinj yaz da dwk goj byaij mbouj loeng loh, doiq gou daeuj gangj, youq lajnamh, caeuq youq gwnz- deih, cungj sug dangqmaz.”

De byaij hwnj giz sang bae, cengj gaiq deihbanj faex ndeu doxhwnj, liuxle youh cengj hwnj gaiq moq, daj ndaw geh iet gyaeuj okbae.

“Ngamq deng lo.”

De doq okrengz hemq, doq ndonj doxhwnj byaij haeuj aen ranz baihgwnz bae.

“Gou youh guhbaenz lo. Cingqngamj deng giz diemj, cingqngamj deng giz cungsim. Vaiq daeuj yawj vei.”

Duzvanh caeuq sam duz nyaenma lwg riengjvaiq riengz de benz hwnjbae, gyoengqde daengx roengzdaeuj ndwn youq gizhaenx aj bak dwk, cungj mbouj rox guh gijmaz, vah cungj gangj mbouj okdaeuj lo. Aenvih gij doxgaiq gyoengqde seizneix yawjraen haenx, cingq dwg nyaenma fangzhwnz siengj aeu, goj dwg duzvanh fangzhwnz siengj aeu, dwg aen mbwn doenghduz cingq dungxiek.

“Beix vanh ndei gou,” nyaenma sienseng duenhdingh naeuz, “neix dwg aen canghung Banghswh mbouj! Gij doxgaiq ceiq ndei de youq soengq bae hawciengz gaxgonq, cungj dwg yo youq gizneix lo. ”