Hei, daihgya ndei! Gou dwg Cinz bozsw, gou mboengqneix fatmingz cungj dohgunghnwngz gihgiyinz ndeu, de saenzgeiz lai lo.

Yienghceij de miz di lumj vunzcaen nei, miz gyaeuj、miz ndangdaej、miz gen、miz ga. Hoeng de dwg yungh cungj nazmij caizliuh daegbied guhbaenz, lij ancang gauhgohgi denswjbanj, ndigah miz haujlai goengnaengz saenzgeiz.

Yawj, gwnzgyaeuj de seiq- fueng miz aenbak rox gangjvah, aenvih ndaw gyaeuj ancang le cinwngz sinhben, ndigah rox gangjvah、ciengqgo、ci lwgseuq. Seiz de ci lwgseuq naengz dawz duzroeg bazgoh heuh gvaqdaeuj ne.

Lwgda de lumj song aen dienhdaeng nei, daengz dieg laep, daengbauq couh gag rongh. Seiz de caeuq vunz gangjvah, aendaeng couh baez yaeb baez yaeb, lumj bouxvunz yaeb lwgda.

Gwnz ndang de dwg yiengh- seiqgak, aendungx de miz aen dou ndeu, hai aen dou, baihndaw cawzliux miz denlubanj, lij miz geij aen sieng, baihndaw cang miz sawbonj、vanzgi、 dangz. Mwngz cijaeu gangj:“Gihgiyinz gihgiyinz, gou aeu gwn dangz.”De couh lumj yinzhangz guiyenzgih haiz ngaenz nei haiz dangz okdaeuj. Mboujgvaq bouxcawj aeu dawz doenghyiengh yo haeuj ndaw bae gonq cij ndaej. Danghnaeuz mwngz siengj yawj densi, mwngz couh doiq de naeuz:“Gihgiyinz, gihgiyinz, gou siengj yawj densi.”Aendou de couh bienqbaenz densi bingzmu, couh ndaej yawj densi lo. Danghnaeuz siujbaengzyoux miz daezmoeg mbouj rox guh, couh doeg daezmoeg hawj gihgiyinz dingq, gihgiyinz couh youq gwnz bingzmu yienh’ok gejdap goqcingz. Caen ndei ha!

Genfwngz gihgiyinz rox bienq raez bienq dinj, seiz mbouj guhhong, fwngz de caeuq fwngz vunz raez ityiengh, fwngz de mbaet mak youh vaiq youh lai, boux gihgiyinz ndeu mbaet mak dingj ndaej bak boux vunz ne! De lij rox baet denhvahbanj, vanzlij rox doeng roenbaizraemx dem! Caen ak ha!

Gij din gihgiyinz an miz seiq aen loek, gij deihfueng de vadgvaq, cungj dawz gizdieg haenx baet ndaej seuqsatsat, di faenx ndeu cungj mbouj miz, de vanzlij rox caeuq vunz doxdax buet ne.

Mbouj miz guh mbouj daengz, cijmiz siengj mbouj daengz. Doh- gunghnwngz gihgiyinz gou saenz- geiz ba! Cinjbi guh baenz buek lo, gyoengqsou vaiq dingh’aeu ba! Aen 998 maenz.

(Sanglinz Yen Dafungh Cin Cungsim Hagdangz seiq nienz- gaep Cinz Cihsan boux lauxsae son’gyauq Mungz Cwngzgen)