（ciep geizgonq）

“Raeuz dwg bouxlawz?” Nyaenma sienseng cam naeuz.

“Sojmiz gyoengqraeuz duz vat congh, couh dwg mwngz、gou、duzoenj, lij miz duzdouq、maex raeuz caeuq gyoengq lwg raeuz. Lienz duz nouguk aen congh iqiq cungj ndonj gvaqbae ndaej haenx, seizneix goj caeuq maex de caeuq roek duz lwg de ndoj youq ndaw congh gou bw. Raeuz dauqdaej wnggai guhlawz guh, beix nyaenma? Gou yawj raeuz cungj deng dai lo!”

Nyaenma sienseng yawjyawj sam duz lwg bonjfaenh, riuriu. Gyoengq lwg goj dwg ndawsim rox gijmaz eiqsei doiq de riuriu. “Laujvanh ndei gou,” nyaenma sienseng naeuz, “hawj sou bungz baengz gizdieg yung’yiemj baenzneix, cungj dwg gou mbouj deng……”

“Gou rox dwg mwngz mbouj deng!” Duzvanh hozhwnj naeuz, “caiqlij gyoengq bouxcawj ciengz dajciengx haenx gaeb mbouj ndaej mwngz haengjdingh mbouj dingz fwngz. Boihseiz, neix couh dwg naeuz dou goj duet mbouj ndaej gvanhaeh, sojmiz doenghduz gwnzbya cungj doxlumj.” Duzvanh naengh roengzdaeuj, yungh faj nyauj ndeu got duz lwg iq de dwk. “Raeuz deng dai lo,” de gangj yomjyomj, “maex hojlienz gou youq baihgwnz gaenq nyieg dangqmaz, vat mbouj doengh saekdi lo.”

“Maex gou goj dwg baenzneix,” nyaenma sienseng naeuz, “mboujgvaq seizneix de cingq bwh donq gaeqbiz ndeigwn ndeu hawj gou caeuq gyoengq lwg bw……”

“Gaej gangj!” Duzvanh hemq naeuz, “gaej gangj riu lo! Gou caen souh mbouj ndaej lo!”

“Neix dwg gangj caen!” Gyoengq nyaenma lwg okrengz naeuz, “daxboh mbouj dwg gangj riu! Dou aeu ndaej haujlai gaeq!”

“Aenvih sojmiz doengh gij neix cungj dwg gou mbouj deng,” nyaenma sienseng naeuz, “ndigah gou cingj mwngz doxcaez bae gwn, gou cingj daihgya——mwngz、duzoenj、duzdouq、duz nouguk caeuq maex sou caeuq gyoengq lwg sou——cungj daeuj doxcaez gwn. Gou goj ndaej coh mwngz baujcingq, doxgaiq gaeuq daihgya gwn.”

Duzvanh naeuz: “Baenzneix ceiq ndei lo!”