Mbat banringzgvaq ngoenz singhgiz ndeu, gou cingq raiz cozyez, mbouj roxnyinh raiz daengz 6 diemj lo. Gou ietiet hwet, mwh yaek bae yietnaiq, sawqmwh raen daengngoenz gaenq caix roengzbya, mbatneix ndaej yawjngonz daengngoenz doek congh lo.

Gou yawjraen aen daengngoenz lumj aen giuzfeiz hung cingq dawz nei, lwenq nding baenz mbiengj mbwn, lumjbaenz gaenq diemj dawz aenmbwn lo, gwnz mbwn daj haurongh bienqbaenz ndingfeiz. Fwj gwnz mbwn hix nyumx hwnj saeknding ronghsien, lumjbaenz duj dem duj vameizgveiq nding youq gwnz mbwn hai. Ndit mbouj lumj banringz yienghhaenx lwenqda, lumj dwg bienqbaenz canghveh cingq veh saek gim migmyanz hawj doenghgo nei, gofaex daz caengz gimmbang, youh sieng geij diuz gimdiuz hawj dujva gwnz diegnywj, couh lienz aen giuz bingzseiz mongmumu hix bienqbaenz migmyanzmyanz. Seizneix, seiqgyaiq lumjbaenz sawqmwh bienq ndaej caemrwdrwd, duzma dingz mbouj raeuq, duzroeg mbouj heuh, couh lienz sing lingz ci hix dingz lo, lumjbaenz gwnzbiengz gijmaz cungj yawj gij gingjsaek gyaeundei daengngoenz doek congh nei.

Riengzdwk seizgan baenaj, gwnz mbwn youh miz gij gingjsaek wnq. Ndithaemh gaenq bienqbaenz saek ndinghenj, hix mbouj lwenqda geijlai lo. Rumz iq ci gvaqdaeuj, fwj gwnz mbwn hix cingq bienq yiengh mbouj doengz, mahenj、meuzhenj、maxnding……Hawj gou yawj mbouj gib, yawj cingcuj duj neix, youh loeng gvaq duj haenx, yawjraen duj haenx, lingh duj youh bienq yiengh, caen dwg bienqbaenz lai cungj lai yiengh ha！

Sawqmwh, daengngoenz doek roengzbae lo, riengjret raixcaix, lumjbaenz lij dingq ndaej nyi sing “dung” ndeu.

Gij gingjsaek daengngoenz doek congh gyaeundei neix, caen hawj vunz nanzlumz！

(Bwzswz Si Daih’it Siujyoz Sunh Yenj)