Doenghduz baengzyoux gou dwg duz mameh ndeu, dwg ranz daxdaiq ciengx, gou gig maij duzde.

Duz mameh neix bwn daengx ndang saekhenj, bwn de gig dinj, lumh hwnjbae raeuzred, gig cwxcaih. Aen’gyaeuj samgak iqetet. Dujrwz hix dwg samgak, daengjsohsoh, yawj hwnjbae cingsaenz gvaekgvaek. Lwgda de youh ndaem youh rongh lumj song naed rinbauj ndaem nei.

Aenndaeng de ndaemndet, nyouq ak raixcaix. Danghnaeuz ndaw fwngz mwngz gaem gagaeq, de youq gizgyae couh nyouq rox lo, de couh buet gvaqdaeuj, fouqda daengj yawj gagaeq, myaiz rihdangdang. Danghnaeuz mwngz mbouj hawj de gwn, de couh itcig riengz mwngz. Danghnaeuz riengz nanz le, de couh fatheiq lo, loh’ok heujma, caen dwgriu. Gou couh dawz gagaeq vut hwnj gwnz mbwn, duz mameh sikhaek diuq hwnjdaeuj, gamz ndaet gagaeq haisim dwk buet deu lo.

Duz mameh cawz maij gwn gagaeq, lij maij gwn ndok、noh、haeux……Dou gwnngaiz gvaq, daxdaiq couh dawz haeuxlw hawj duzma gwn, duzma couh gwnguk gwngak, gwn sat le, lij yungh diuzlinx riz ndaeng de, youh riz aenbak, lumj dauqngeix gij haeuxbyaek ndei haxbaenh gwn nei.

Duz mameh neix buet ndaej gig vaiq, gou ciengzciengz caeuq de doxdax buet. Miz baez ndeu, gou caeuq gobiuj、daxdaiq lij miz duz mameh neix itheij bae diegnywj hung guhcaemz. Aen diegnywj neix caen gvangq! Dou angqyangz youq gwnz diegnywj dajringx, mameh hix riengzdwk dajringx, mizseiz diuqbywngbywng, diuzrieng baez bi baez ngauz, daekeiq raixcaix. Gou yawjraen de yienghhaenx daekeiq couh siengj bae gwih de, de yawjraen gou yaek bae gwih de, couh sikhaek buet deuz lo, lumj naq yienghhaenx vaiq. Gou gyaep de, gyaep ndaej gwnz gyaeuj hanh lae hanh conh、baegfofo, duz mameh daekeiq dwk nyeux gyaeuj yawj gou, gou couh iet fwngz bae lumh aen’gyaeuj de, de couh iet diuzlinx daeuj riz fajfwngz gou!

Duz mameh neix couh dwg doenghduz baengzyoux gou, gou gig maij de , mwngz maij de lwi?

(Sanglinz Yen Dafungh Cin Cungsim Hagdangz seiq nienzgaep Cinz Cihsan, boux lauxsae son’gyauq Mungz Cwngzgen)