Ngoenz singhgiz, guekvuengz ndaw ndoengfaex——duzsaeceij, baenzngoenz mbouj miz saeh guh, roxnyinh mbwq dangqmaz.

Hoeng guh maz ne？ De youq ndaw goengdienh naemj bae naemj dauq, sawqmwh de naemj daengz roegdingfaex hai bouq gai huq ndeu, yienghneix de gietdingh hix hai bouq cauhsi ndoengfaex ndeu.

De heuh baengzyoux ndei duzguk daeuj bang guh gaiq baiz ndeu, baihgwnz raiz：“Cauhsi Ndoengfaex”, songde hab- hoz dangqmaz, yienghneix couh dawz gaiq baiz venj youq baihrog goengdienh.

Bouxhek daeuj lo, dwg duz maxdah ndeu.

Duzsaeceij cam duzmaxdah：“Cingj cam mwngz aeu gijmaz ne?”

Duzmaxdah gangj naiqnueknuek naeuz:“Gou fatsa lo, naemj cawx aen goujcau hung ndeu.”

Duzsaeceij naeuz:“Go maxdah, mwngz caj yaep ndeu, gou bae ra！”

Duzmaxdah haetcwi mbat ndeu, songde roxnyinh aen ranz cungj daenh mbat ndeu. Guhmuengz bae fan sieng ra gvih. Songde hanh lae hanh conh, hix ra mbouj ndaej aen goujcau baenzhaenx hung, doeklaeng duzmaxdah saetmuengh dauqbae lo.

Duzguk hainduj doiqlaeng lo.

De caeuq duzsaeceij guekvuengz naeuz: “Raeuz aiq mbouj hab hai cauhsi, mboujnex raeuz guh loh wnq ba！”

Duzsaeceij baez baenq da naeuz：“Vunz cungj aeu gwn haeux, mboujyawz raeuz hai aen diemqhaeux ndeu ba！”

Duzguk angqyangz ngaek gyaeuj naeuz：“Baenz, baenz!”

Yienzhaeuh gyoengqde couh hai- nduj caepcawq huqgwn caeuq hongdawz dajcawj, nyaengqfoedfoed, angq dangq- maz. Duzguk youh guh gaiq baiz ndeu baihgwnz raiz：“Diemqhaeux Hung Guekvuengz”.

Bouxhek daeuj lo, dwg duzyiengz ndeu caeuq baengzyoux de.

Duzsaeceij naeuz：“Cingj cam gyoengqsou yaek gwn gijmaz?”

Duzyiengz naeuz：“Gyoengqdou naemj gwn hojgoh Swconh.”

Duzsaeceij vuenheij naeuz: “Ndei, gou seizneix couh bae caepcawq hawj gyoengqsou.”

Gyoengq yiengz caj haujlai nanz, yaek ninz ndaek lo. Daengzlaeng aen hojgoh hoenzngeungeu homfwtfwt dawz okdaeuj lo. Duzyiengz gwn gaemz ndeu deng manh yaek dai bae. Goq mbouj ndaej cuengq dawh roengzdaeuj couh buet ok baihrog bae. Duzsaeceij roxnyinh geizheih, de mingzmingz cimz gvaq, mbouj miz vwndiz ha!

De hawj duzguk cimzcimz naeuz：“Guekvuengz mwngz guh ndaej manh lai lo！”Daengz neix cij rox duzyiengz caeuq bonjfaenh gwn mbouj doxdoengz.

Doeklaeng, gyoengqde mbouj hai diemqhaeux lo. Mwh laepmomj, duz- saeceij naengh youq henz dah’iq sijsaeq naemjnaemj：Gou lijdwg guh guekvuengz suenq lo！

（haj nienzgaep Cinz Yinzmuz）