（ciep geizgonq）

12 Duzvanh

Nyaenma sienseng caeuq sam duz nyaenma lwg louz roengzdaeuj haenx riengjvaiq itcig vat coh baihnaj. Seizneix gyoengqde cungj angq dangqmaz, goj mbouj raen baeg roxnaeuz iek lo. Gyoengqde rox gvaq yaep ndeu couh yaek miz aen hoihlaeuj hoengh ndeu caj gyoengqde bae gwn, gangj caen, doiq gyoengqde daeuj gangj, mbouj miz gijmaz doxgaiq ndeigwn gvaq gij gaeq Bozgizswh lo, baez siengj daengz diemj neix, gyoengqde couh angq dwk riuvaeng’vaeng lo. Daegbied hawj gyoengqde angq dwg, boux dajciengx bizbod haenx seizneix cingq maeuq youq gwnz goengq bya iq caj gyoengqde iek dai, hoeng de soengq donq ndeigwn ndeu hawj gyoengqde, de bonjfaenh doiq neix cix maz cungj mbouj rox. “Laebdaeb vat,” nyaenma sienseng naeuz, “mbouj gyae geijlai lo.”

Sawqmwh, miz sing daemqnaek ndeu daj baihgwnz gyoengqde cienz daeuj:“Bouxlawz youq gizhaenx?” Gyoengq nyaenma doeksaet yat. Gyoengqde riengjvaiq ngiengx gyaeuj hwnjbae yawj, yawjraen miz faj naj ndaem bwnnyumnyum youh siemj youh raez ndeu daj aen congh iq dingj deihgoengq ndeu conh okdaeuj.

“Duzvanh!” Nyaenma sienseng hemq naeuz.

“Beix nyaenma!” Duzvanh hemq naeuz, “goeng- mbwn gou ha! Gou dauqdaej ra raen duz buenx lo, caen vuenheij lai lo! Gou gaenq baenq bae baenq dauq vat baenz sam ngoenz sam hwnz lo. Gou gaenq mbouj cingcuj bonjfaenh seizneix youq gizlawz lo!”

Duzvanh hai hung aen congh iq dingj deihgoengq haenx di ndeu, daj dingj de diuq roengzdaeuj, ndwn youq henz gyoengq nyaenma. Duzvanh iq ndeu (duz lwg de) goj riengz laeng de diuq roengzdaeuj lo.

“Mwngz dingq gangj goengq bya iq baihgwnz ok saeh maz lij caengz?” Duzvanh gikdoengh naeuz, “luenh liux lo! Ndoengfaex miz byongh ndeu cungj mbouj raen lo, daengx lajmbanj gizgiz cungj dwg gij bouxsai dawz cungq! Raeuz daihgya cungj okbae mbouj ndaej lo, lienz aenhaemh cungj mbouj ndaej! Raeuz cungj yaek deng iek dai!”