Seizgan couh lumj raq rumz iq, baez yaepda gou gaenq majhung lo, caiq hix dauqbae mbouj ndaej nienzgeij gaxgonq gijmaz hix mbouj rox, hoeng daxmeh hix menhmenh bienq geq.

Daxmeh youh roengzrengz guhhong ngoenz ndeu le baeg yaek dai ninz youq gwnz mbonq, sikhaek couh ninz ndaek lo. Yawj de naj naiqnuek, lumj dujva angjhai yaepyet couh roz nei. Gou caeuq daxmeh naeuz: “Gou bang mwngz roi gyaeuj ba, lumjbaenz gou lij caengz bang mwngz roi gyaeuj gvaq.” Daxmeh haisim ngaekngaek gyaeuj. Mwh roi gyaeuj, gou sawqmwh raen daxmeh miz haujlai byoemhau. Yienzlaiz mwh gou mbouj roxnyinh daengz, daxmeh hainduj geq lo, gou hix menhmenh majhung. Ndawsim gou miz song loh sing’yaem, loh ndeu naeuz: Gaej naemj lo, vunz cungj bienq geq. Lingh loh naeuz: Aenvih mwngz, daxmeh cij miz byoemhau, couh dwg aenvih mwngz hawj de yousim.   

Dwg ha, aenvih gou deubak, daxmeh dwgrengz cawj haeux liux, youh gya cawj gij byaek gou gyaez gwn hawj gou; aenvih gou gaujsi cingzcik mbouj ndei, daxmeh nyaengq ngoenz ndeu le, dauqranz lij aeu bang gou un saw. Aiq dwg mwh de nyaengq, mwh de yousim, diuz dem diuz byoemhau cij maj okdaeuj. Gou rox bonjfaenh wnggai baenzlawz guh lo.

Daj seizhaenx gvaqlaeng, gou cuengqhag dauq daengz rug couh roengzrengz hag, mbouj hawj daxmeh yousim, mbouj daengz diemj cung ndeu, cozyez couh guh sat lo. Daxmeh doeksaet dangqmaz, aenvih gou couh lumj bienq boux vunz ndeu nei.

Couh dwg mwh yawjraen byoemhau daxmeh, gou rox dwg seiz gou majhung lo, mbouj ndaej hawj daxmeh yousim lai lo, wnggai hawj de vuenheij gou majhung lo.

(seiq nienzgaep Cangh Sinhyangz)