Ngoenz ndeu, dangz yijvwnz le, gou byaij hwnj gyangjdaiz, caepcawq bae ra baengzyoux ndei guhcaemz.

Sawqmwh, Cinz lauxsae yijvwnz heuh gou. Yienzlaiz, de yaek hawj gou bang de sou mbawgienj lienhguh gyoengq doengzhag gaijcingq sat haenx bae hawj de. Gou laeglemx riu, yienghneix gou ndaej okbae lajroq byaijbyaij lo.

Gou dawz mbawgienj lienhguh bae daengz bangunghsiz, gou raen Cinz lauxsae nyaengq raixcaix, yaep ndeu gaij cozyez gizneix, yaep ndeu gaij cozyez gizhaenx. De gaenjgip caeuq gou naeuz：“Mwngz bang- bang gou ndaej lwi?” Gou hoiz naeuz：“Ndaej ha, lauxsae.” Lauxsae youh naeuz：“Yienghneix mwngz bang gou yawjyawj cozyez haxbaenh mwngz sou, yawjyawj byawz caengz gyau cozyez.” Gou naemj baenzneix yungzheih, couh ngaek gyaeuj dapwngq lo.

Yienghneix, gou goq mbouj ndaej youq lajroq guhcaemz, doq dauq ndaw gyausiz sijsaeq cazdoiq cozyez. Seizneix boux baengzyoux ndei gou heuh gou okbae guhcaemz, gou ngauzngauz gyaeuj caeuq de naeuz：“Mwngz bae guhcaemz ba, gou lij aeu bang lauxsae cazdoiq mingzdan.” De cienq ndang deuz lo.

Gvaq yaep ndeu, gou cazdoiq cozyez sat le, naemj daengz Cinz lauxsae dagaenhyanx, youh mbaq baenzfung, gou lij dwg caiq cazdoiq baez moq, lau miz loengca, Cinz lauxsae lij aeu cazdoiq. Gou couh caem roengzdaeuj, youh cazdoiq baez moq, cij cuengqsim soengq bae hawj de.

Cinz lauxsae cam gou miz mbouj miz byawz caengz gyau, gou naeuz：“Miz boux ndeu caengz gyau, dwg Goz doengzhag caengz gyau.” Lauxsae hawj gou bae heuh Goz doengzhag gyau cozyez. Yaepyet, gou couh dawz cozyez Goz doengzhag gyau hawj lauxsae lo.

Seizneix, Cinz lauxsae angqyangz raixcaix. Yienghneix ciengj hawj gou bingz cijsoemj ndeu. Gou hix vuenheij raixcaix, gou deq mbouj gib ndoet hwnjdaeuj. Bingz cijsoemj neix youh soemj youh van, feihdauh vandiemz raixcaix ha!

Seizneix, gou sawqmwh roxnyinh daengz ndaw cijsoemj neix miz gij feihdauh angqyangz gou guhhong.

(Sanghaij Swhfan Dayoz Fusuz Vaigozyij Siujyoz Linz Yijcin)