Hei! Daihgya ndei! Gizneix miz boux lwgnyez ndeu, bineix gouj bi, gvaq cib ngoenz dem couh ndaej cib bi lo. Gou bingzseiz gwn haeux mbouj lai, ndigah vunz iqet, maj ndaej naj hau noh maeq, yienj ndaej ndang cangqcwd. Lwgda mbouj hung mbouj iq, ndaemndet youh rongh, seiz naemj vwndiz, lwgda cienqlili. Baez haisim riu ndaej lwgda nyaeuq baenz diuzmae, aenbak loh ok bet diuz heuj, yienznaeuz gou maj ndaej mbouj sang, hoeng gou miz song diuz ga buet ndaej gig vaiq, miz baez ndeu hagdangz doxdax buet, gou lij ndaej daihngeih mingz, sou cai de dwg bouxlawz, deng lo, de couh dwg gou.

Gou ceiq maij dik cuzgiuz, hagdangz miz aen cuzgiuzcangz, gizhaenx dwg diegangq lwgmbauq iq dou. Baez daengz dangz dijyuz, dou couh bae cuzgiuzcangz dik giuz, gou dik giuz haeuj dougiuz, daihgya cungj haenh gou ak lai lo. Gou lij dang gvaq bouxsoujdou ne! Seiz doiqfueng dik giuz gvaqdaeuj, gou couh daihdamj dwk coemj hwnjbae umj aengiuz, daihgya cungj haenh gou ak raixcaix ne!

Gou miz cungj bonjsaeh ndeu, couh dwg caeuq roeggeuq gangjvah. Ranz gobiuj ciengx miz song duz roeggeuq, bonjlaiz roeggeuq gig caemdingh, gou baez depgaenh de, fatok sing roeg heuh, song duz roeggeuq couh angq hwnjdaeuj, coh gou heuh cici caca, gou ngeng coh baihswix, gyoengqde hix diuq coh baihswix, gou ngeng coh baihgvaz, gyoengqde hix diuq coh baihgvaz, gyoengqde cici caca hemq dwk, de siengj caeuq gou gangjgoj guhcaemz ne!

Gou hix caeuq duzma gyauhliuz ndaej, duzma ranz gobiuj hung raix- caix, youh yakrwix, aenbak gvangq- langlang, yawj hwnjbae dwglau lai, hoeng gou gaem ga de, de couh lauxsaed aeu ga hawj gou gaem ne! Gou lumh gyaeuj de, de couh riz fwngz gou ne.

Neix couh dwg gou gvaigvet dwggyaez, mwngz siengj caeuq gou guh baengzyoux lwi?

(Sanglinz Yen Dafungh Cin Cungsim Hagdangz seiq nienzgaep Cinz Cihsan boux lauxsae son- gyauq Mungz Cwngzgen)