（ciep geizgonq）

11 Maex Nyaenma Doeksaet Mbat Ndeu

Duz nyaenma lwg daiq sam duz gaeqmeh biz haenx, riengjret riengz mbiengj deihgoengq deuz dauqbae, de vuenheij yaek dai. “Caj yawj lo!” De naemj mbouj daengz, “daxmeh yawjraen gijneix, lij mbouj rox yaek baenzlawz yiengh bw!” Gij roen de deuz gyae lai, hoeng de youq gwnzroen baez ndeu cungj mbouj dingz gvaq, de sawqmwh daeuj daengz baihnaj daxmeh de. “Daxmeh!” De baegfofo hemq naeuz, “yawj vei, daxmeh, yawj vei! Vaiq ndiu hwnjdaeuj, yawjyawj gou daiq gijmaz daeuj hawj mwngz!”

Maex nyaenma aenvih nanz lai mbouj gwn doxgaiq, ndangdaej nyieg gvaq doenghbaez haujlai. De hai mbiengj da ndeu, yawjraen sam duz gaeq haenx, “gou fangzhwnz!” De gag damzmboedmboed, doeklaeng youh laep da bae lo.

Maex nyaenma byaengq ok song aen da, fwt naengh hwnjdaeuj, “hoeng, lwg ndei gou!” De okrengz naeuz, “dauqdaej daj gizlawz aeu daeuj?”

“Rongzgaeq 1 hauh Bozgizswh!” Duz nyaenma lwg vah cungj gangj mbouj baenz lo, youh naeuz, “Dou Cingqngamj vat daengz laj deihbanj gizhaenx, mwngz daengx ciuh cungj mbouj raen baenzlai gaeqmeh youh hung youh biz gvaq! Lij miz, daxboh naeuz bwh ndei aen hoihlaeuj ndeu! Gyoengqde yaepyet couh dauqma lo!”

Maex nyaenma yawjraen gijgwn, roxnyinh youh miz rengz lo. “Itdingh aeu guh aen hoihlaeuj ndeu!” De doq gangj doq ndwn hwnjdaeuj, “o, daxboh sou dwg duz nyaenma ak lai ndeu! Vaiq di, lwg, ciemz bwn gaeq!”

Nyaenma sienseng youq giz gyae’gyae ndaw deih- goengq gangj naeuz: “Gyoengq lwg ndei, raeuz seizneix guh gienh saeh moq! Gienh saeh neix couh ngaih lai lo! Raeuz aeu guh dwg vat diuz deihgoengq iq daj gizneix doeng coh gizhaenx ndeu!”