Geiq ndaej mwh lij iq, daih- iek caet bet bi, gou caeuq daxboh ban- haemh bae ndawdah mo sae.

Dou dawz doengj iq, gwih dienhdanci bae henzdah. Gwnzroen rumz baed gou liengzsisi, byoem- gyaeuj gou cungj mbinfefe.

Daengz henzdah, gou caeuq daxboh vid gavaq couh roengz dah, raemxdah gyoetrwdrwd, lumj gaiq nae iqet ndeu youq lajdin gou. Gvaq yaep ndeu, gou cij doengh fwngz bae mo sae, hoeng daxboh youq henzgyawj gaenq mo ndaej haujlai sae lo. Gou naemj： Mbouj ndaej, gou mbouj ndaej saw daxboh. Yienghneix, gou riuj aen doengj iq mo bae mo dauq, mo haujlai nanz cij mo ndaej sae. Gou nyeux gyaeuj yawj daxboh, daxboh seizbienh couh mo ndaej baenz dong.   

Gou hixnaengz byaij bae naj geij yamq, sawqmwh “budung” mbat ndeu, gou doek roengz ndawdah bae, aen doengj ndawfwngz hix deng vut gvaq henz bae, fouz youq najraemx. Gou gipmuengz ndwn hwnjdaeuj bae gip aen doengj, baez yawj baihndaw, dai lo, sae gou cungj doek roengz ndawdah bae liux lo. Gou youh gipmuengz bae gip sae haeuj ndawdoengj bae.

Couh youq seizneix, gou miz aen naemjfap rwix ndeu, bae caeg sae daxboh. Gou laeglemx byaij daengz henzdoengj daxboh, riengjret bae aeu gaem sae ndeu cuengq haeuj ndawdoengj gou bae. Gou yawj daxboh lij caengz cienq ndang gvaqdaeuj, youh bae aeu gaem moq, yienzhaeuh couh riengjret cienq ndang bae gizwnq mo sae.

Mwh daxboh cienq ndang gvaqdaeuj cuengq sae, raen noix haujlai sae, couh cam gou：“Sae ndawdoengj gou dwg mbouj dwg mwngz caeg bae？” Gou laeglemx riu couh deuz lo. Daxboh raen gou mbouj han, youh naeuz：“Gou couh rox dwg mwngz.”

Mbwn yaek laep lo, gou hix caeuq daxboh gwih dienhdanci dauqranz lo, gou yawjraen sae ndawdoengj couh danq naeuz：“Ha, sae lai baenzneix, wnggai miz geij bak aen ba, yienghneix ceuj ndaej geij buenz ha!”

Ngoenzneix caen dwg ngoenz gyaeundei ndeu, caj geij ngoenz daengx ranz vunz couh ndaej gwn sae ndeigwn lo.

(haj nienzgaep Vangh Veiwnh)