Fwn gvaq raemx dah haenq,

Daxgoeng aen ruz saenq.

Va hoengz faex heuswd,

Bak cit fwn niuniu.

Dingq, boux goenglaux neix youh eu fwen vad ruz daeuj lo. De dwg bouxlawz ne? Hihi, de couh dwg boux youq yienhsingz dou aen baksok he, moix ngoenz cauh aen ruziq ndeu soengq vunz gvaq dah.

Miz ngoenz ndeu, Dahgenz- gyangh raemx swng sang, gwnzdah langh sang gvaq vunz. Boux goenglaux cauhruz neix raen yungyiemj lai, moix mbat cij cauh boux vunz ndeu gvaq dah.

Daengz banhaemh, doengzseiz miz sam boux vunz ganj daeuj aeu naengh ruz gvaq dah, boux he dwg vwnzsiucaiz, boux he dwg vujsiucaiz, caiq miz boux he dwg yahlaux guh nazreih dauqma.

Seizneix mbwn yaek laep, gyoengqde cungj siengj vaiqdi ganj baema ranz, cungj ceng hwnj ruz gvaq dah gonq. Baenzlawz guh ne? Lij dwg boux cauhruz neix miz geiqmaeuz, de naeuz: Sou sam boux gag nam souj sei ndeu, yungh “soemsetset, luenzlulu” haidaeuz gangj, byawz gangj ndaej ok bonjfaenh ceiq ak byawz couh gvaq dah gonq.

Baenzlawz guh? Siucaiz ndawsim gag ngeix: Gou rox saw lai nam souj sei miz maz hoj? Nam couh nam! Couh ngaek gyaeuj dapwngq lo. Ngeix mbouj daengz yah guh nazreih hix mbouj lau, han naeuz: Nam couh nam.

Boux vwnzsiucaiz baez dingq, ndawsim gag riu ciengj dwk nam hwnjdaeuj :

Ganj bit soemsetset,

Buenz maeg luenzlulu,

Gou nam souj sei ndeu,

Gauj ndaej vwnzcangyenz,

Daenj buhsei buhduenh,

Guenj saeh hung saeh iq.

Nam sat, enjak ngauz gumq, yamqdin couh siengj hwnj ruz.

Vujsiucaiz lienzmuengz lanz dwk naeuz: Menh hwnj. Menh hwnjbae! Dingq gou gangj :

Gyaeujnaq soemsetset ,

Raggung luenzlulu,

Nyingz le haeuj simnaq

Couh gauj ndaej canghyienz,

Vuengzdaeq baengh gou guenj,

Lajmbwn couh vuenyungz.

Nam sat, ngiengxgyaeuj enjak, couh aeu yamqdin hwnj ruz.

Yah guh nazreih vad fwngz muengz lanz dwk naeuz: Gaej gaenj! Lij miz gou ne! Ciep dwk nam hwnjdaeuj :

Bakcae soemsetset,

Ekguengj luenzlulu,

Dou song ha gyaeujyah,

Ndaem naz youh guh reih,

Ciengx song lwg……

Goenglaux cauhruz rox gij eiqsei, daegdaengq cam naeuz: Song daeglwg mwngz seizneix guh gijmaz? Yah guh nazreih han naeuz: Boux he dwg vwnzsiucaiz, boux he dwg vujsiucaiz. Gangj sat yamqdin couh hwnj ruz. Goenglaux cauhruz riuhaha dwk doq vad ruz doq cienq gyaeuj doiq song boux lij ndwn youq gwnzsok haenx naeuz: Gou soengq “daxmeh” sou gvaq dah gonq, caiq daeuj ciep sou gvaqbae bw!

(Vujsenh Yen Dungzlingj Cin Sinhlungz Siujyoz Lungz Ging’yi)