“Baenzlawz?” De mbouj riu lo, “gou riu ndaej mbouj habdangq?”

“Mbouj dwg, gou yiemjyiemj deng laemx lo.”

De iet fwngz ndeu daeuj rex gou, gig unqswnh rag gou byaij.

“Gou laihnaeuz mwngz youq baihlaeng gaex gou baez he, mbouj hawj gou riu ne!”

“Gou baenzlawz rox yienghneix guh?” Gou najmong dap.

“Doenghgij bi neix daeuj, gou siengj riu couh riu, siengj hemq couh hemq, mboujnex, caeux couh deng daioemq lo.”

“Gvaiq mbouj ndaej bouxwnq cungj naeuz mwngz baenzbag lo.”

“Caen ndaej baenzbag fanjdauq hix ndei o, ai!”

“Ndang ndeisak mbouj baenz ha, vihmaz siengj baenzbag ne?”

“Baenzbag le, hix couh mbouj miz nyapnyuk lo, mwngz lij iq, doenghgij saeh neix lij caengz rox.”

Baenzlawz youh naeuz gou iq mbouj roxyiuj, ndaejnyi gij vah neix gou couh mbouj cwxcaih, gou gik caiq haibak, hawj de rex gou byaij.

Daihcibbet Gip Maknganx

Aulungzgveiz itcig soengq gou daengz bakdou ranz gou, de cij dauqbae. Gou heuh de haeujdaeuj naengh yaep ndeu, de cix sing ndeu cungj mbouj han cienq gyaeuj couh byaij deuz lo.

“Ahbyauh, mwngz buet bae ranz lawz guhcaemz la?” Meh ndaejnyi gij sing gou, daj ndawrug dawz aen daeng’youzhaeu ndeu byaij okdaeuj, lij faek gou, “mbwn cungj laep le, daiq mwngz haxbaenh lij siengj okbae ra mwngz ne!”

“Gou youq miuhsaenzvangz baihlaeng ranz Aulungzgveiz ndoj fwn.”

“Aiya!” Meh hemq hwnjdaeuj, lumj sawqmwh deng duznon maz haeb gaemz ndeu nei, “mwngz buet daengz gizhaenx bae guhmaz? Daengq mwngz lai baez lo, gaej caeuq de doxyouq, mwngz couh dwg rwzraez!”

Meh gou gig noix baenzneix hat gou, haemhneix hozgaek ndaej yaek dub gou, gou deng haep ndaej doiqdauq song yamq.

Fajdoudangq baez yiengj sing he, aen ngaeuz gipgip muengzmuengz daj ndawding byaij okdaeuj.

“Gaej gvaiq Ahbyauh, dwg gou heuh de bae hane.”

Ndei lo, daxdaiq okdaeuj bang gou gangjvah, gou couh maz cungj mbouj lau lo.

“O?” Meh doeksaet yat, “baenzlawz heuh Ahbyauh bae ra bouxbag haenx?”

(caengz sat)