Gou daej lo.

Vahsug naeuz “raemxda lwgsai mbouj luenh doek”, hoeng, ngoenz- neix raemxda gou nyaenx mbouj ndaej lae roengzdaeuj lo. Gij raemxda neix, dwg raemxda gamjdoengh, dwg raemxda angqyangz.

Bineix, youq dieg Mbanjcuengh, fwnmoenq soebsoeb, mbwn nitriri. Gyoengqvunz cingq angqvauvau gvaq ndwencieng, binghraq sawqmwh roemx daeuj. Yaep seiz, gyoengqvunz simvueng, baez lwnh gij binghraq neix saeknaj doq bienq. Ngoenz daihngeih, gak mbanj gak gyok cungj fung roen liux lo.

Gij binghraq baezneix dwg bouxsai ndeu youq diegrog dauqranz gvaqcieng, de deng lah bonjfaenh mbouj rox, gvaqcieng youh cunz caencik baengzyoux, baenzneix hauj- lai vunz deng lah. Cungj binghdoeg lah vunz gig vaiqveq, danghnaeuz fuengzre mbouj gibseiz, doeklaeng couh nanz guh lo.

Cungj binghdoeg neix baenzneix haenq, baenzlawz mbouj hawj vunz lau ne? Gvaq mbouj geij ngoenz, couh miz bak lai boux vunz ndaej deng lah cungj bingh neix lo.

Seizneix gamhanh binghraq ceiq youqgaenj. Miz vah naeuz “dieg ndeu miz nanh, bet fueng doxbang”. Yaep seiz, gak dieg gingjcaz、canghyw、husw daengj daj seiq mienh bet fueng ganj daeuj. Gyoengqde mbouj lau yungyiemj, mbouj lau sinhoj, baez daeuj daengz couh guh saeh, mbouj gamj daengx roengzdaeuj yietnaiq, ciengj faen dued miux caeuq binghraq doxhoenx.

Mizseiz dungx iek lo, gyoengqde lienz haeuxngaiz cungj mbouj goq ndaej gwn, lij ndwn youq ndaw nit hawj gyoengqvunz guh hwzsonh, nyaengqfoedfoed.

Mizmbangj vunzlaux byaij roen mbouj fuengbienh, gyoengqde couh caenndang hwnj ranz bae bang guh hwzsonh.

Roen bya mbouj ndei byaij, fwn doek roen raeuz, gyoengqde laemx le, hwnjdaeuj laebdaeb byaij baenaj. Gyoengqde baeg le couh naengh youq gwnznya henzroen yietnaiq. Gyoengq- de naiq le couh bomz youq gwnz- daengq ninz yaep ndeu.

Gyoengq vunzmbanj raen daengz neix, sim’in youq mbouj onj, gyoengqde mwngz dawz haeux, gou dawz byaek, de dawz fwnz, mizmbangj ndawranz miz duz moucieng mbouj sij ndaej gaj hix dawz okdaeuj gaj lo. Naihlaux ga’gvez fwngzgvaz gaem diuz faex daemxdwngx, fwngzswix riuj dawz duzgaeq, baez ngaek baez ngeu byaij daeuj. Lwgnyez soemh nit soemh fwn riuj bit daeuj.

Daihgya miz ngaenz ok ngaenz, miz rengz ok rengz, cungj naeuz, baenzlawz hix mbouj ndaej hawj gyoengq canghyw caeuq husw dungx iek bae guhhong.

Vunzmbanj bingzseiz mbaet gwn mbaet yungh, hoeng doiqnaj cainanh, gyoengqde naemj hix mbouj naemj couh dawz gij doxgaiq ndawranz okdaeuj, guekcoj raeuz miz gij lwgminz neix, baenzlawz mbouj hawj vunz gamjdoengh.

Gyoengq ganbu、dangjyenz、gyoengq gingjcaz caeuq gyoengq canghyw husaw, mbouj lau sinhoj dwgrengz, heuh daeuj couh daeuj, heuh guh couh guh, cienz sim cienz eiq bang vunzlai, miz gyoengqde, guekcoj lij miz maz saehnanh guh mbouj ndaej gvaqbae? Miz gyoengqde guekcoj baenzlawz mbouj giengz- cangq, baenzlawz mbouj bingzan?

Binghraq youh daeuj daengz, gyoengqvunz caezsim cawzcied de.