bouxraiz Lozwjdwz·Dazwj bouxhoiz Cwz Fanghdingz

罗尔德·达尔 著 翟芳婷 译

（ciep geizgonq）

10 Rongzgaeq 1 Hauh Bozgizswh

Yienghneix de caeuq seiq duz lwg de youh hainduj vat lo, seizneix vat ndaej menh gvaq lai lo, hoeng gyoengqde mbouj doeknaiq, vat mbouj dingz, deihgoengq hainduj baez di baez di iet coh baihnaj.

“Gou mbouj gamj gangj ok- daeuj,” nyaenma sienseng naeuz, “aenvih giz deihfueng gou naemj bae haenx ndei raixcaix, danghnaeuz gou doiq sou gangj yaq, sou itdingh faengz yaek dai, linghvaih ni, danghnaeuz raeuz bae mbouj daengz gizhaenx (neix gig miz gojnaengz), sou youh haengjdingh doeknaiq yaek dai. Gyoengq lwg ndei gou, gou mbouj siengj sou miz maqmuengh lai lai.”

Gyoengqde mbouj dingz vat ndaej haujlai nanz, dauqdaej ndaej geijlai nanz, gyoengqde goj mbouj rox, aenvih diuz deihgoengq lajnamh ndaemnyamnyam, mbouj rox gyang- ngoenz, caemh mbouj rox gyang- haemh, hoeng doeklaeng, nyaenma sienseng minghlingh dingz roengz- daeuj, de gangj naeuz: “Gou siengj, raeuz ceiq ndei laeglemx hwnj baih- gwnz bae yawjyawj, yawj cingcuj raeuz daengz gizlawz lo. Gou rox giz deih- fueng yaek bae, hoeng gou mbouj cingcuj raeuz dwg mbouj dwg daeuj daengz henzgyawj giz deihfueng haenx lo.”

Gyoengqde hainduj menhmenh baegbongz gengz vat hwnj gwnznamh bae, baez di baez di iet doxhwnj. Sawqmwh, gyoengqde vat deng cungj doxgaiq geng gwnz gyaeuj ndeu, mbouj miz banhfap vat doxhwnj lo. Nyaenma sienseng byaij gvaq baih- naj bae cazyawj, gij doxgaiq geng neix dwg benjfaex! De laeglemx naeuz, “dwg benjfaex! Neix couhdwg naeuz, danghnaeuz gou guj ndaej deng, raeuz cingqngamj youq laj aen ranz boux vunz ndeu.” Nyaenma sienseng laeg- lemx naeuz, “seizneix gou yawjyawj, gaej ok sing.”