Youq mwh baenz binghraq sinhgvanh lai neix, gyoengqde itcig youq dieg ceiq baihnaj hoenx binghraq, gyoengqde dwg vunz ceiq dwggyaez——“diensawj buhhau”.

Youq baihnaj binghraq, gyoengqde mbouj goq bonjfaenh ancienz soujhoh raeuz, miz mbangj gaenj mbouj ndaej caeuq vunz- ranz gwn haeuxdoxcomz, gipgip muengz- muengz coq dawh roengzdaeuj couh ganj bae dieg ceiq baihnaj hoenx binghraq. Byawz cungj rox binghdoeg mbouj miz cingz, byawz cungj rox gyoengqde hix dwg vunz bingz- ciengz, hix dwg daxgoeng、daxbuz、daxboh、daxmeh、lwglan daengj, hoeng gyoengqde lijdwg senj sij ranz iq vih ranz hung, buet bae dieg ceiq baihnaj hoenx binghraq, rap mbaqrap guh boux canghyw.

Mwh baeznaengz gou youq gwnz densi yawj saehmoq hoenx binghraq, cungj yawj- raen gyoengqde youq gizhaenx nyaengqfoed. Gyoengqde youq aen gangjvei bonjfaenh roengzrengz hoenxciengq, bang boux dem boux bouxbingh hoenx hingz binghdoeg. Hoeng, mwh gyoengqde duet buhfuengzhoh roengzdaeuj, baihndaw cungj dwg raemxhanh ndingq ndaej okdaeuj; mwh gyoengqde duet goujcau caeuq gingqhohda, gwnznaj gyoengqde cungj dwg rizsienq rizmae. Gyoengqde hawj raeuz youq ranz noix okdou, bonjfaenh cix lizhai aen ranz raeujrub youq dieg ceiq baihnaj hoenx binghraq.

Ginggvaq “diensawj buhhau” mbouj- duenh roengzrengz, miz haujlai bouxbingh ndaej saeqsim gouqyw bingh ndei ok yihyen. Hoeng binghdoeg cingq bienqyiengh, bingh- raq lij caengz gat, mbouj rox ciengz ciengq mbouj miz hoenzbauq neix seizlawz dingz ndaej, hoeng gou saenq, cungj miz ngoenz ndeu, “diensawj buhhau” haengjdingh hoenx hingz binghraq.

(Bwzswz Si Yougyangh Gih Aisinh Siujyoz Ciz Yidungz)