“Aen cawjeiq mwngz ndei bw.”

“Yienghneix vihmaz mbouj bae ne? Ga mwngz hix goj ndaej caiq yw ndei.”

“Yanghgangj! Deng lo, baenz- baenz gou cungj aeu bae.”

“Vihmaz mbouj caeuxdi bae ne? Gij haemzhoj baenzlai bi mwngz hix gwn gaeuq luba.”

“Mbouj, seizneix gou mbouj ndaej bae.”

“Seizlawz cij bae?”

“Gou aeu deq——Mbouj, gou lainoix miz di sij mbouj ndaej lizhai Mbanjgyaeujdah. Daj lij iq couh youq gizneix majhung, caemx ndawdah、raih gwnznamh, mbouj miz saek boux vunz mbouj roxnaj, mbouj miz saek go faex mbouj bin gvaq, baez lizbae, doeklaeng yaek siengj caiq dauqma, couh……”

“Mwngz sij mbouj ndaej lizbae, caiqlix youh gvaq gvenq cungj saedceij neix, couh gaej bae lo!” Gou mbouj gienq de lizhai mbanjranz lo, maqmuengh de ndaej ce youq, gou lij miz boux vunzhung he ndaej ciengzseiz gangjriu guhcaemz, miuh- saenzvangz hix miz vunz baet, cungj beij mbouj miz de ndei lai lo.

“Doeklaeng menh gangj ba—— Bae, fwn daengx lo, gou soengq mwngz maranz.”

Gou ndwn hwnjdaeuj lo, lumh- laep byaij coh bakdou, de baez ragrag genfwngz gou, oet aen doxgaiq ndeu haeuj ndaw fwngz gou, yenzlaiz dwg aenlamz.

Baihrog, fwn daengx lo, dauq- cawq cungj dwg raemxfwn yiengj “vava” lae dwk, gizgyae gig mumj- gyumq, gij gumz gwnz roen ingj ndaej gij rongh myox ronghndwen. Aulungz- gveiz byaij youq baihnaj, gou yamq diuq yamq yat riengz youq baihlaeng, caeklaiq lohdin, yaemh youq ndaw gumz, dauqfanj nyinhnaeuz sangj- swtswt caemhcaiq gig ndeimaez.

Gvaengz gvaq goengq bya iq, gou ngeix hwnj gij vah haxbaenh de daengq gou, yienznaeuz dapwngq de lwnh gij goj hawj daiq gou, hoeng vihmaz de mbouj gag bae lwnh ne?

“Aulungzgveiz, ngoenzcog mwngz daeuj ranz gou, baenz lwi?”

“Guh maz?”

“Mwngz gag lwnh gij goj mwngz hawj daiq gou ha.”

“Mbouj, mbouj, gou lwnh mbouj ok! Haemhneix danghnaeuz mbouj dwg aenvih gou gwn laeuj lo, hw, mwngz hix gaej siengj ndaejnyi gij goj gou ne.”

“Boux vunz mwngz caen geiz- heih!”

“Geizheih? Hahaha……”

Gij sing riuhaha youq ndaw ndoengfaexnganx hap, din gou deng ragfaex gaz baez ndeu, saemxsax bongh baenaj, caeklaiq ndang Aulungzgveiz sangset ndaej dingj gou, gou cij mbouj deng laemx.

(caengz sat)