Gak boux aeu dingq ndei,

Seizneix miz binghraq,

Guekgya miz lingh gvaq,

Caez dingq vah aendangj.

Binghdoeg neix fouz ngaeuz,

Mbouj rox daeuj saek seiz,

Gag roxnyinh lij ndei,

Mbouj ngeix naeuz miz bingh.

Seizneix dangj haucau,

Aeu gauj ndei fuengzre,

Mbouj dwg vah lexhe,

Mbouj re mwngz couh raen.

Hojgyanq raeuz mbouj lau,

Ngamq lau binghraq daeuj,

Youq ranz denz goemq gyaeuj,

Binghdoeg hix mbouj naih.

Beixnuengx caiq doxgyaez,

Hujgeiq caiq doxheuh,

Gaej comz youq giz ndeu,

Deuz binghdoeg gaxgonq.

Miz saeh yaek okrog,

Aeu gyok ndei goujcau,

Bae caeuq vunz doxgyau,

Cij mbouj lau dawz bingh.

Gij bingh neix yak lai,

Daihgya aeu haeujsim,

Miz cien ngaenz fanh gim,

Cawx diuz mingh mbouj dauq.

Fuengzre ceiq gaenjaeu,

Baengh gyoengq raeuz vunzlai,

Bouxboux hengzdoengh vaiq,

Daihgya cij bingzan.

Hong fuengzre nyaengq lai,

Canghyw baij daeuj daengz,

Doxgaiq fuengzre caeng,

Binghraq daeng ndaej cawz.

Ganbu cungj doxceng,

Ok faenh rengz bangcoh,

Fwn rumz nit mbouj goq,

Cij vih hoh vunzlai.

Ndwencieng mbouj caengz gvaq,

Binghraq couh fuk daeuj,

Fung dieg mbouj okhaeuj,

Genj ok couh bae yw.

Binghraq mbouj caengz gvaq,

Daihgya mbouj cuengqsoeng,

Bouxboux sim doxdoengz,

Itdingh hoenx ndaej hingz.