Ngamq daengz cieng coloeg,

Roegga gwnzmbwn heuh,

Binghraq caen dwg euq,

Youh deuz daengz Baksaek.

Fwn doek rumz youh boq,

Gyoet daengz hoz lienz din,

Daeuzmbanj mbouj ndaej ninz,

Daiq bing bae dawz geuq.

Daihhagseng ngamq dauq,

Haucau bae re bingh,

Daenj geu majgyaz nding,

Minghlingh daengz couh buet.

Roengz mbanj rau dijvwnh,

Daengz gyanghwnz cij dauq,

Fwn doek roen youh hauz(raeuz),

Gvauh laemxhoemj laemxhai.

Dawz geuq youq ndaw fwn,

Gwq ndwn mbouj ndaej naengh,

Okdou bohmeh daengq,

Caenhrengz vih lwgminz.

Binghraq riengz cin dauq,

Lingjdauj gig yawjnaek,

Heuh daengx aen Baksaek,

Fungsaek mbouj doeng loh.

Baksaek binghraq haenq,

Seiqfueng gaenq daeuj riengz,

Dajdingh dwg ngoenz cieng,

Canghyw ciuqyiengh daeuj.

Canghyw daengz mbanj raeuz,

Couh daeuj guh hwzsonh,

Vih lwgminz an’onj,

Mbouj ndaej ninz donq imq.

Canghyw daenj buhhau,

Caen sau lumj va’maenj,

Guhhong bouxboux gaenx,

Baenzlawz mbouj ndaej haenh.

Boux fuengzbingh dwgrengz,

Hwnj geng youh roengz lingq,

Vih vunzlai yw bingh,

Aeu mingh bae doxgoq.

Vunzlai caen gamjdoengh,

Soengq bit gaeq nohmou,

Bouxgeq soengq haeux youz,

Lwgnyez couh soengq va.

Dujva gaem gyangfwngz,

Canghyw mwngz mbouj daej,

Vih lwgminz guh saeh,

Bouxboux maeh daengz mwngz.

Fuengz bingh mbouj lau nit,

Nditndat sikhaek daengz,

Rumzcin boq baihlaeng,

Daengngoenz ronghsagsag.

Baksaek ndaej gej fung,

Siet doeng menhmenh vaq,

Canghyw doiq baema,

Raemxda lae mbouj dingz.