Yawj liux vagi 《Lwgnyezrauh Vangz Danenz》, gou roxyiuj le gij saehsaed Vangz Danenz daj iq laeb ceiqheiq hung, vih saedyienh lijsiengj, lauxlaux saedsaed, baenz yamq baenz yamq bae hag.

Vangz Danenz daj iq couh miz lijsiengj hung, de naemj bae dicizdui guhhong, lumj daxboh nei vih guekgya caeuq sevei okrengz. Yienghneix, de roengzrengz rox saw rox sa. Miz baez ndeu, Vangz Danenz caeuq geij boux doengzhag byonghhwnz laeglemx buet bae funghsaedniemh guh saedniemh, doeklaeng deng bouxhendou Moz daxgoeng yawjraen, mwh buet deuz lij dwk byoengq gicaiz ndaw funghsaedniemh. Doeklaeng deng lauxsae roxyiuj le, lauxsae mboujdan mbouj naeuz gyoengqde, lij haenh gyoengqde gyaez hag dem, lwnh gij gojgaeq Nozbeiwj vih yenzgiu ywbauq haenq, saedniemh saetbaih cien fanh baez hawj gyoengqde dingq. Gvaqlaeng lauxsae lij bang gyoengqde boiz gij saedniemh gicaiz deng dwk byoengq haenx.

Ngoenzneix, raeuz ndaej youq aen nienzdaih huzndei mbouj hoenxciengq neix gvaq ndwenngoenz, liz mbouj ndaej gyoengq banlaux dwgrengz buekguh、mbouj goq dailix. Neix hawj gou naemj daengz gij vehmienh denyingj 《Cangzcinhhuz》, doenghgij cansw ciyenginh vih bang Cauzsenj hoenx Meijgoz、henhoh guekgya mwh giepnoix doxgaiq lij giensouj cindi, hwnzngoenz mbouj doengh bamq youq diegnae, mizmbangj cansw youq ndaejhingz gaxgonq deng nit dai, gyoengqde yungh lwed caeuq ndangnoh vuenh daeuj aen Cungguek moq huzndei.

Gyoengq doengzhag, raeuz aeu insik seizneix, ndeindei bae hag, majhung guh boux vunz doiq guekcoj、doiq sevei mizyungh ndeu.

(Baksaek Si Yougyangh Gih Cunghvaz Siujyoz Cinz Suhcinz)