(ciep geizgonq)

9 Nyaenma Sienseng Miz Aen Giva Ndeu

Cungj guhcaemz giendingh souj neix laebdaeb daengz sam ngoenz sam hwnz.

“Nyaenma mbouj gwn haeux mbouj gwn raemx, lix ndaej geijlai nanz?” Bozgizswh youq ngoenz daihsam cam.

“Seizneix mbouj yungh geijlai seizgan lo,” Bijwnh doiq de naeuz, “de gig vaiq couh yaek iek dwk deuz okdaeuj. De haengjdingh yaek okdaeuj.”

Bijwnh gangj ndaej deng, gyoengq nyaenma ndaw deihgoengq lajdieg cingqcaen yaek menhmenh iek dai lo.

“Danghnaeuz raeuz ndaej gwn saek gaemz raemx couh ndei lo.” Duz nyaenma lwg ndeu naeuz, “daxboh, mwngz guh saekdi gijmaz mbouj ndaej ha?”

“Daxboh, raeuz haenq bongh okbae mbat ndeu ndaej mbouj ndaej? Baenzde raeuz lij miz di gihvei ndeu, mbouj dwg ha?”

“Gaenbonj mbouj miz gihvei,” nyaenma sien- seng yiemzsuk naeuz, “gou guhlawz cungj mbouj hawj sou hwnj baihgwnz bae najdoiq gij cungq haenx. Gou cingznyienh hawj sou youq gizneix bingzdingh dai bae.”

Nyaenma sienseng gaenq haujlai nanz mbouj gangjvah lo. De song da laep maenhmaenh bae, maeuq youq gizhaenx mbouj doengh saekdi, caiqlij dingq mbouj ndaej nyi duz nyaenma wnq cingq gangj gijmaz. Maex nyaenma rox, de cingq roengzrengz siengj banhfap okbae. Seizneix, youq mwh de yawj de, de raen aen ndang de doengh di ndeu lo, menhmenh ndwn hwnj. De yawjyawj maex baih- laeng bonjfaenh, lwgda myab ok di rongh faengz ndeu.

“Baenzlawz ne, bouxgvan ndei gou?” Maex nyaenma sikhaek cam naeuz.

“Gou ngamqngamq siengj ok di banhfap ndeu.” Nyaenma sienseng siujsim naeuz.

“Gijmaz?” Gyoengq lwg de hemq naeuz, “daxboh, gijmaz banhfap?”

“Gangj vaiqdi!” Maex nyaenma naeuz, “vaiq lwnh dou!”

“W……” Nyaenma sienseng gangj naeuz, liuxle couh dingz roengzdaeuj danq gaemz heiq ndeu, naj saepsaeng ngauzngauz gyaeuj. De youh maeuq roengzdaeuj. “Aen banhfap haenx mbouj ndei,” de naeuz, “haenx dauqdaej guh mbouj baenz.”

“Vihmaz mbouj baenz, daxboh?”

“Aenvih haenx couh dwg naeuz raeuz lij aeu laebdaeb vat congh, hoeng raeuz gaenq sam ngoenz sam hwnz mbouj gwn doxgaiq lo, bouxlawz goj mbouj miz rengz laebdaeb guh roengzbae lo.”

“Dou guh ndaej, daxboh!” Gyoengq nyaenma lwg hemq diuq hwnjdaeuj, gvaq baihnaj daxboh gyoengqde bae, “dou guh ndaej! Dou guh ndaej mbouj ndaej, mwngz couh yawjyawj lo! Mwngz goj guh ndaej!”

Nyaenma sienseng yawjyawj seiq duz nyaenma lwg, riu lo. De gag siengj, gyoengq lwg gou ndei lai lo! Gyoengqde iek yaek dai lo, sam ngoenz daeuj gyoengqde gaemz raemx ndeu cungj mbouj ndaej gwn, hoeng gyoengqde lij caengz duix roengzdaeuj. Gou itdingh mbouj ndaej hawj gyoengqde doeknaiq. “Gou……Gou siengj raeuz aiq sawqsawq ndaej.” De naeuz.

“Vaiq gangj lovei, daxboh! Gangjgangj mwngz siengj hawj dou guh gijmaz.”

Maex nyaenma menhmenh ndwn hwnj. Aenvih mbouj gwn doxgaiq mbouj gwn raemx, de youh coj- gvaq gyoengqde moix duz. Ndang de nyieg raixcaix. “Gou doiq mbouj hwnj sou lai lo,” de naeuz, “hoeng gou siengj gou lij bang ndaej saekdi.”

“Mwngz couh youq gizneix caj, maex ndei gou,” nyaenma sienseng naeuz, “dou gag guh ndaej lo.”