Daih miz daih aeu guh, daih miz daih dangrap. Laemxseiz raeuz daih vunz neix mbouj aeu lumj banlaux nei hwnj ciengz hoenxciengq、henhoh guekgya, hoeng youq aen nienzdaih huzndei、 mbouj hoenxciengq neix gvaq ndwenngoenz, raeuz hix aeu doiq guekgya、doiq sevei、doiq beksingq miz dangrap.

Seizhaenx dwg ngoenzgvengq gouj nyied ndeu, ndit daj geh mbaw- faex ciuq daengz gwnzdieg, ngaeuz- faex ngauzngwdngwd. Yienznaeuz miz rumz iq baed haeuj naj, heiq ndat cix mbouj sanq saekdi. Daegbied dwg banringzgvaq, daengngoenz venj dingjgyaeuj, nditndat lumj feiz ciuq daengz gyoengqvunz gwnzdieg, hag- seng cuengqhag dauqranz、vunz byaij roen ngamq roengzban lumj duzmoed ndaw rekndat nei, ngaem gyaeuj dwk、yungh fwngz dangj ndit gaenjgip byaij baenaj; danci、 dienhdanci gwnzroen hix lumj duzbyanouq ndaw raemxgoenj, youq gwnzroen baebae dauqdauq, mbouj nyienh youq lajndit lai saekdi.

Ndaw gyoengq vunz gaenjgip byaij neix, hix miz gou. Gou caeuq haujlai hagseng youq gwnzroen doxlumj, ngaem gyaeuj dwk, byaij youq laj raemhfaex, ndoj ndit haenq. Couh youq seizneix, gou dingqnyi raq sing “bibi baba” ndeu, hoeng mbouj haeujrwz. Gvaq yaep ndeu, byaij dwk byaij dwk, doengzhag baihnaj dingz roengzdaeuj lo, gou ngaem gyaeuj ndoj ndit, yawj raemhfaex lajdin ndwi, mbouj haeujrwz cingzgvang baihnaj, cadi couh caeuq de doxbungq. Byaij daengz baihnaj de, gou nyeux gyaeuj yawjyawj de, raen de ndwn youq baihnaj sienqmaxraiz, yawj gvaz yawj swix, raen gvaz swix cungj mbouj miz ci hai gvaqdaeuj, couh buet coh roen iq baihnaj. Gou naemj baihnaj mbouj miz raemhfaex, de yaek gvaqbae guh maz. Cij raen de byaij daengz baihnaj le, youh coh baihnaj buet song yamq cij dingz roengzdaeuj. Gou daengx da yawj, baihnaj de miz hangz danci caezyiengj ndeu laemx youq gwnzdieg. De haeuj gyawj aen danci caezyiengj, gaeuz hwet roengzdaeuj, fwngz gaem gyaeuj ci, fwngz gaem diegnaengh, fuz aen ci hwnjdaeuj, caiq coq gaci roengzdaeuj. Yienzhaeuh bae fuz aen wnq, gaeuz hwet baez moq fuz aen ci hwnjdaeuj.

Seizneix boux hagseng ndeu gvaq roen, raen de fuz danci caezyiengj hwnjdaeuj, hix caeuq de doxcaez fuz. Gou yawjyawj gyoengqde, hix bae caeuqfaenh. Yaep ndeu, dou couh dawz danci caezyiengj laemx gwnzdieg fuz hwnjdaeuj liux, dangq boux dangq bae.

Neix dwg gienh saeh iq yawj mbouj hwnjda ndeu, ndaw ndwen- ngoenz raeuz ciengzseiz miz haujlai saeh iq baenzneix, danghnaeuz mbouj bae guh hix mbouj yingjyangj raeuz, hoeng raeuz guh le couh ndaej fuengbienh haujlai vunz, neix hix dwg gij dangrap daih raeuz.

(Nanzningz Si Denhdauz Saed- niemh Hagdangz Dunghgoz Yaugih Cungh Gyahmingz)