“Hahaha……”

Aulungzgveiz sawqmwh riuhaha hwnjdaeuj, sing beij sing baihrog fwndoek lij coegrwz ne.

Gou diemheiq diddid, youq ndaw laep lumjnaeuz yawjraen song lwgda Aulungzgveiz heumyanmyan, hawj gou bwndauz daengx ndang daengjcwcw.

Caeklaiq, Aulungzgveiz riu le yaep ndeu, fwt daengx roengzdaeuj lo, song fwngz ca mbaq gou, ngaeq naeuz:

“Cingj mwngz lwnh gij goj gou hawj daiq mwngz. Geiq ndaej lwi?Lauheiq gou gangj mbouj cingcuj.”

“Gou ndaej geiq.” Gou doq dap- wngq, youq ndaw gyanghaemh laep- saksak neix, caen yousim Aulungz- gveiz yaek fatbag, nyaenj gou dai bae.

“Hojsik!” De soeng fwngz, dauq- laeng yamq ndeu, gangjgvegve, “mbouj miz laeuj lo.”

“Mwngz gaenq gwn moengj laeuj lo.” Gou lau de caiq gwn laeuj, laeuj fiz mbouj dwg maz saehndei bw.

“Hojsik nohngwz hix caep lo.”

“Gwn gaiq gau gou dawz daeuj ba! Dwg daxmeh gou naengj ne!” Gou raeuqmbaeu naeuz.

“Deng, lij miz gaiqgau ne! Caen gyo’mbaiq daxmeh mwngz lo!”

De youq ndaw laep lumh ndaej gaiqgau, gou ndaej nyi gij sing de gaemz hung nyaij.

“Aulungzgveiz, yienghneix daeuj gangj, mwngz caen dwg vunzndei lo?” Gou youq ndawuk dauqngeix gij saehgonq haxbaenh de gangj. Mbouj- danh doengzcingz de, caemhcaiq engq gingq de fug de, “mwngz vihmaz mbouj caeuq caezgya gejnaeuz ne? Mwngz dwg vunzndei ha, hawj bouxwnq gangj baenz vunzrwix, ien- uengj fouzbeij!”

“Ien’uengj? Hw! Lajmbwn mbouj miz gij saeh ndeindupndup bw. Ah Byauh, mwngz lij iq, mbouj rox, caj mwngz majhung le couh rox lo.”

Gou lumjnaeuz roxyiuj maz nei, ndawsim miz di mbouj fug, gizsaed gou nyinhnaeuz bonjfaenh gaenq mbouj iq lo, hoeng gyoengq vunzhung cix cungj yawj gou guh lwgnyez. Cungj gangj gijneix mwngz mbouj rox, gijhaenx mwngz hix mbouj rox, baenzlawz ndaej mbouj rox ne? Lumj aen goj Aulungzgveiz gangj neix, ngamq hainduj, gou couh dingq ndaej ok Lungz Byauh boux boihseiz haenx couh dwg de. Sawqmwh, gou ngeix ok aen cawjeiq ndei he daeuj.

“Mwngz vihmaz mbouj caiq bae Yanghgangj ne? Caiq bae aen ngaenz- hangz haenx guhhong, cungj beij gwq maeuq youq gizneix ndei ha.”

(caengz sat)