Binghraq gyuek ndaej vaiq,

Daiq hawj caihaih daih,

Caezgya mbouj yietnaiq,

Itheij caiq fuengzre.

Binghraq youh fuk daeuj,

Raeuz aeu haeujsim daih,

Cungj riengz dangj raeuz byaij,

Vunzlai maij youh haenh.

Fuengzre yisiz giengz,

Yienghyiengh ndaej huzswnh,

Seiqgyaiq bouxboux haenh,

Gwndaenj cungj mbouj you.

Aen dieg deng binghraq,

Couh gaenj caz gaengoek,

Cwngfuj guh mbouj loek,

Ra daengz goek caeuq byai.

Youz dieg rog dauqma,

Guenj song ga cijndaej,

Gag gekliz swhgeij,

Fuengzre geiq ndawsim.

Daj dieg rog haeuj ma,

Song ga cungj aeu guenj,

Dauqcawq youz mbouj duenh,

Dangh gyuek sonjsaet lai.

Bae gyawz cungj yienj max,

Max saekloeg cij haeuj,

Bouxboux aeu guh daeux,

Mbouj ndaej yiemz saeh fanz.

Mbouj sim you sim fanz,

Caem youq ranz couh baenz,

Binghdoeg da mbouj raen,

Deng lah caen mbouj rox.

Vih aenndang swhgeij,

Haeujsim mbouj guh loeng,

Swhsiengj mbouj cuengqsoeng,

Hoengq mbouj comz guh’angq.

Gyoengqvunz yaek dingq gangj,

Binghdoeg bangq youq rog,

Mbouj caezbienh haeuj ok,

Daengzcog bingh mbouj lah.

Lwgminz sim coh dangj,

Angqyangz gvaq ndwenngoenz,

Caez caeuq binghraq hoenx,

Binghraq dingh deng mied.