Ranzmbanj gou youq Cungzcoj Si Denhdwngj Yen, ndawsim gou, diuzroen ceiq gyaeundei dwg diuzroen dauqranz gou.

Baez cuengqgyaj, daxboh couh hai ci daiq gou caeuq daxgoeng dauq ranzlaux, hai duenh roen gauhsuz gonq, yienzhaeuh roengz roen gauhsuz, ca mbouj geijlai 200 goengleix roen, 2 diemj cung couh ndaej dauq daengz ranzlaux lo. Ci hai youq gwnzroen mbinfefe, gou gyaez hai cueng, doq nyouq gij heiqhom nywj faex henzroen, doq dingq daxgoeng naeuz gij bienqvaq ranzmbanj.

Daxgoeng gou dwg bouxhaici geq, hai ci gvaq ndwenngoenz, doenghbaez dwg hai ci dap hek baedauq Nanzningz caeuq Denhdwngj, goengloh heux bya goz youh gaeb hawj de ciuhvunz lumz mbouj ndaej. Seizhaenx, daj Denhdwngj daengz Nanzningz dwg “song mbiengj ndaem”, banhaet ranz caengz rongh couh yaek haidin, daengngoenz doek congh cij daengz Nanzningz. Dingzlai roen dwg roensa, najroen cungj dwg rinsa, hai ci gvaq moekmoenq mbinfofo, hai mbat ci ndeu, vunz ndaw ci byoem、naj、buhvaq cungj dwg moekmoenq. Roenbya cawz hwnj roenlingq couhdwg roengz roenlingq, roen goz lai youh gaeb、roen lingqlangqlangq, luegbya ciengzseiz miz moknaek, vihneix ciengzseiz miz ci doxbungq. Seizhaenx, daxgoeng hai ci caen dwg vihliux gvaq ndwenngoenz.

Gaijgwz hailangh le, roen Denhdwngj daengz Nanzningz hwnqguh ngoenz ndei gvaq ngoenz, gaxgonq aeu hai ci 10 diemj lai cung seizneix cij hai 2 diemj cung, ci hai youq diuzroen youh bingz youh gvangq, gij doenghyiengh yawjraen cungj dwg baenzhaenx gyaeundei.

Danghnaeuz cam gou gwnzbiengz diuzroen ceiq gyaeundei youq gyawz? Couhdwg diuzroen dauqranz! Gyo’mbaiq dangj caeuq cwngfuj, hawj diuzroen dauqranz dou ngoenz ndei gvaq ngoenz, hawj ndwenngoenz dou ngoenz ndei gvaq ngoenz.

(Nanzningz Si Sihyanghdangz Siujyoz Liuz Sinhbei)