Ngoenzneix, henz dah’iq ndaw ndoengfaex sawqmwh hoengh hwnjdaeuj, yienzlaiz ndaw ndoengfaex hai aen youwzyenz ndeu, bohranz doenghduz cingq daiq doenghduz iq daeuj bauqmingz ne. Gou dwg duj fwj mbin youq gwnzmbwn ndeu, ndaej yawj gij gingj baihlaj cingcuj, gou daeuj caeuq mwngz gangj miz gijmaz saeh ba!

Daih’it dwg daxgoeng duzguk daiq duzguk iq daeuj bauq bandwknyaen, yienzhaeuh dwg daeggo roegbeggap daiq daegnuengx roegbeggap bauq banhagmbin. Seizneix, duzmou iq byaij loeng lo, ra mbouj raen daxboh bonjfaenh, raen gyoengq roegbeggap bauq dangz hag mbin, duzmou iq hix buet gvaqbae, yaek bauqmingz.

“Boux siujbaengzyoux neix, duzmou haengj- dingh mbin mbouj ndaej!” Duzciengh bouxhenhoh ndoengfaex lwnh duzmou iq, yienzhaeuh cam de：“Bohranz mwngz ne？”

Duzmou iq naeuz：“Mbouj rox, aiq youq gizlawz ninz ndaek lo.”

Bouxhenhoh ndoengfaex duzciengh rox duzmou iq dwg ra mbouj raen bohranz lo, yienghneix buet bae fungh gvangjbo dawz vahdoengz naeuz：“Bohranz duzmou iq haeujrwz lo, duzmou iq youq banhagmbin gizneix, cingj mwngz dingqnyi gvangjbo le sikhaek daeuj banhagmbin, gyo’mbaiq mwngz boiqhab!” Daxboh duzmou dingqnyi le, sikhaek buet bae banhagmbin daiq duzmou iq deuz. Daxboh lwnh duzmou iq：“Raeuz mbouj rox mbin, raeuz aeu hag gwnhaeux、ninz、gyaen!” Gangj sat, daxboh daiq duzmou iq bae ra lauxsae duzgaujlah lo.

Gyoengq doenghduz iq bae daengz aen gyausiz bonjfaenh. Va! Saenzgeiz lai! Aen gyausiz duzguk iq dwg ndoengfaex ndeu, lauxsae gyoengqde dwg daxau saeceij. Daxau saeceij hawj doenghduz iq bandwknyaen laepda gonq, yienzhaeuh dawz cib geij duznon iq rox doengh seizbienh vut haeuj ndaw cumhnywj bae, heuh gyoengqde haida, vaiq bae ra duznon. Aen gyausiz banhagmbin couhdwg gwnzmbwn heunaunau, lauxsae gyoengq roegbeggap dwg daeggo duzyiuh, daeggo duzyiuh youq gyang- mbwn mbinfefe baij dinfwngz, riengzlaeng, de hainduj son gyoengq doenghduz iq hag mbin. Aen gyausiz ban’apraemx dwg diuzrij ndaw ndoengfaex, lauxsae gyoengq duzbit dwg byaleix sienseng, byaleix sienseng youq najraemx yet hwnj yet roengz, gyoengq duzbit vuenheij dwk heuh “gaga”.

Roengzdangz lo, youwzyenz yenzcangj duzmwi hung cujciz aen hozdung ndeu. Aen hozdung neix dwg dik cuzgiuz, lauxsae guh mbiengj, siuj- baengzyoux guh mbiengj, riengz bouxbuenq roengz- lingh, gyoengq siujbaengzyoux caeuq gyoengq lauxsae hainduj doxdax. Ngamq hainduj, gyoengq lauxsae laebdaeb dik giuz ndaej faen, gyoengq siujbaengzyoux mboujdwg gvaiq bouxdoih couhdwg guhcaemz.

Mwh byonghciengz yietnaiq, gyoengq doengh- duz iq lij cingq hozhwnj bouxdoih. Seizneix, duzma iq saeqsim yawjraen haxbaenh gyoengq lauxsae laebdaeb ndaej faen, dwg aenvih gyoengq lauxsae caezhoz raixcaix, dauqfanj gyoengq doenghduz iq mbouj caezhoz cij baenz yienghneix. Duzma iq lwnh caezgya yienzaen, gyoengq doenghduz iq dingq le vah duzma iq, naj nding rwz dit, cungj dox boizlaex. Byonghciengzlaeng hainduj lo, gyoengq doenghduz iq caezhoz le, laebdaeb ndaej roek faen giuz. Lauxsae raen gyoengqde hag rox caezhoz lo, yienghneix hawj gyoengqde hingz ciengz giuz neix.

(Gveigangj Si Gangjbwz Gih Gveicwngz Gaihdau Cunghsinh Siujyoz Couh Meidungz)