(ciep geizgonq)

8 Gyoengq Nyaenma Hainduj Ngaiz Iek Lo

Haemh haenx, sam aen bungz youq ndaw gumz hung aen bya iq gaq hwnjdaeuj lo, Bozgizswh、Banghswh caeuq Bijwnh boux aen. Sam aen bungz humx youq bak- congh nyaenma. Sam boux bouxcawj ciengz dajciengx naengh youq rog bungz gwn haeuxcaeuz. Bozgizswh gwn sam duz gaeq up budingh; Banghswh gwn roek aen mienh- baucaq, ndawde coq gij daephanq myaij hawj vunz yawj le yaek rueg; Bijwnh ndoet song gyahlunz laeuj makbingzgoj. Gyoengqde sam vunz seizlawz cungj daiq cungq youq gwnzndang.

Bozgizswh gaem duz gaeq ndatfwdfwd ndeu hwnjdaeuj, yo de haeuj henz bakcongh nyaenma bae. “Mwngz nyouq ndaej gijneix ma, nyaenma sienseng?” De hemq naeuz, “gaeqoiq ndeigwn bw! Mwngz vihmaz mbouj hwnjdaeuj gwn ne?”

Feih gaeq noengznwd biu haeuj deihgoengq, itcig biu daengz giz dieg gyoengq nyaenma maeuq youq.

“Daxboh,” duz nyaenma lwg ndeu naeuz, “raeuz ndaej mbouj ndaej laeglemx ndonj hwnjbae ciengj aeu duz gaeq ndaw fwngz de roengzma ne?”

“Baenzneix mbouj ndaej!” Nyaenma sienseng naeuz, “yiengh- neix cingq ngamj gyoengqde siengj hawj mwngz bae guh lo.”

“Hoeng raeuz iek lo!” Gyoengq nyaenma lwg hemq naeuz, “raeuz seizlawz cij ndaej miz gijgwn ni?”

Daxmeh gyoengqde mbouj han, daxboh goj mbouj gangjvah. Neix dwg aen vwndiz mbouj miz banhfap hoizdap ndaej ndeu.

Daengz mwh mbwn ij ndaem, Banghswh caeuq Bijwnh hai song aen daeng ronghsagsag gwnz aenvat rongh haeuj bakcongh nyaenma bae.

“Seizneix,” Bijwnh naeuz, “raeuz doxlawh souj. Boux ndeu souj dwk, song boux ninz, liuxle doxlawh, souj daengz mbwn rongh.”