Mehmbwn ngoenz beij ngoenz ndat lo, ndaw lauz oem mbouj miz rumz ci, youh ndat youh haeu, couh lumj aencaengq nei, miz geij boux- famh hawnyieg gonqlaeng deng ram okbae lo.

Bouxfamhlaux neix engq ngoenh lo, diemheiq vaiq gvaq bouxwnq, ndawhoz yiengjhumhum, lumj fung- sieng nei, hwnzngoenz rag mbouj daengx.

Bouxfamh wnq caemhyouq cungj rox de yaek dai lo, hoeng gyoengqde cungj mbouj dam, cijmiz Lungz Byauh seiz mbouj seiz bae bangfwngz, lumj bwnq de gwn di raemxgyoet nei.

Haemhde, baihrog cingq byajraez doek fwn. Bouxfamhlaux aeu gwn raemx, Lungz Byauh daeuh boux- dawzlauz hawj vanj raemx ndeu, rex de hwnjdaeuj bwnq le geij gaemz. De ndanghaw laemx roengzbae, fwngz ndeu cadawz Lungz Byauh, diemheiq gwdgwd dwk naeuz:

“Lungz Byauh, lauheiq aen seizhah neix gou cengq mbouj ndaej lo.”

“Mwngz goj ndaej.” Lungz Byauh siengsim raixcaix.

“Ndang gou gag rox.”

Lungz Byauh umj cik fwngz de, fwngz de byomroz lumj gyaengh fwnz nei, angjfwngz ndatrad.

“Mwngz cuengqsim ninz ba, baihrog cingq doek fwn hung, haemh- neix rox liengzsangj di.”

“W, swngz seizneix, doeksat gou caiq……lwnh mwngz geij gienh saeh.”

“Miz maz saeh?”

“Aen rwz mwngz ne——”

Lungz Byauh gaenjgip nyeng gyaeuj gvaqbae, ceng mbouj geijlai dep daengz naengbak de lo.

“Gou……gou……” Raq heiq- ndat he cung haeuj ndawrwz Lungz Byauh:“Gou couhdwg ‘Vangz……Vangzvaizgvaiq’……”

“Hai, mwngz——” Lungz Byauh ceng mbouj geijlai doeksaet ndaej swenj oksing daeuj.

“Dujlwgvaiz loengh……loengh gou, ciq cax gaj vunz—— lawh gou……yungh coh gou……”

Lungz Byauh aen sim diuq- bubbub, de ngeix hwnj cib lai bi gaxgonq daxboh de deng nanh. Mboengqgonq baez dem baez cam bouxfamhlaux, de cungj gvax vah bae mbouj dap, liuh mbouj daengz de gingqyienz couhdwg bouxdaeuz “Vangzvaizgvaiq” bang caeggeq haenx!

“Vei, gaxgonq mwngz vihmaz mbouj nyienh lwnh hawj gou ne? Cib lai bi gaxgonq sou ciengjgiep Mbanj- gyaeujdah, goenjcug daxboh gou Lungz Sinhmou, doeklaeng de——”

(caengz sat)