Angqcoux bi duzguk,

Gou hohfuk caezgya,

Gwndaenj cungj mbouj ca,

Mbouj miz maz youheiq.

Bauqrengh hoh bimoq,

Fuk lumj raemxmboq lai,

Ranzranz ndaej fatcaiz,

Cungj najhai najriu.

Hoh bouxgeq ndang cangq,

Ngoenzngoenz angq eu fwen,

Eu ndaej ndawsim vuen,

Sing mbouj rwenz mbouj sat.

Hoh bouxgeq simhai,

Ciengz dwkbaiz gangjgoj,

Caez angq riuhoho(riuhaha),

Gij haemzhoj vut sat.

Hoh bouxgeq naihsouh,

Ndawsim raeuj dangqmaz,

Angqyangz youq ndaw da,

Mbouj miz maz youheiq.

Biguk angq lailai,

Lwg iq gvai dwgmaij,

Guh’angq youh cwxcaih,

Doengzcaez baij vuensim.

Hoh lwgnyez hung sang,

Caez angqyangz haeuj hag,

Doegsaw bienq ndaej ak,

Cauh daegsaek guekgya.

Lwgnyez doegsaw gvai,

Cungj najhai raixcaix,

Ndaej daengz gyoengqvunz maij,

Haenqrengz byaij coh naj.

Bohmeh gyaez youq sim,

Yawj lumj gim ndeiraeuh,

Youh mbouj yienj okdaeuj,

Roengzrengz laeuq ngaenz ma.

Hoh mbwn seiqgeiq ndei,

Haeujsim bae guh reih,

Ndaej hoengq guh seng’eiq,

Canh ndaej leih hix lai.

Hoh ndaem sou habseiz,

Fungsou meiz(miz) maqmuengh,

Guh naz gij beixnuengx,

Hix ndaej hoengq bae youz.

Hoh go au simj sauj,

Okbae cauh ngaenz ma,

Daengx ranz roengzrengz ca,

Gij reihnaz ciuq guh.

Bouxcoz ma miz hong,

Guh ndaej soeng youh swnh,

Caiq mbouj you gwndaenj,

Ndwenngoenz caenh vuenyungz.

Gyoengq dahsau lingzleih,

Cauh ngaenz heih youh lai,

Ngoenzngoenz cungj simhai,

Ndaej lwgsai okhaq.

Hoh lwgmbauq hix gvai,

Bonjsaeh lai raixcaix,

Ndaej daengz dahsau maij,

Bouxboux daiq maranz.

Gap ndaej baenz gvanbaz,

Caez cauhgya bienq fouq,

Doxgyaez hix ndeiraeuh,

Ndwenngoenz youh swnhsim.

Hoh boux guh seng’eiq,

Canh ndaej leih hix lai,

Ngoenzngoenz cungj ndei gai,

Ndaej fatcaiz dahraix.

Hoh gyoengq boux canghyw,

Yw bingh cungj ndaej swnh,

Ndaej daengz gyoengqvunz haenh,

Fukheiq swnj ndaej lai.

Hoh gyoengq boux lauxsae,

Vih son ndei lwghag,

Caez laenz baenz diuzcag,

Ndei lwghag majhung.

Hoh gyoengq boux gingjcaz,

Caez caen ca saed guh,

Lwgminz ndaej henhoh,

Riuhhoho(riuhaha) gvaq ngoenz.

Hoh gyoengq bing yinzminz,

Dawz ndei cin(caen) bonjsaeh,

Hen guek seizseiz geiq,

Lwgminz gyaez dangqmaz.

Hoh bauqse Sawcuengh,

Banh ndaej vuengh dangqmaz,

Hawj Sawcuengh haeuj da,

Cienz cien gya fanh daih.

Hoh daengx guek lwgminz,

Caez yamqdin baenaj,

Fukheiq youq baihnaj,

Cingq dwg caj raeuz aeu.

Hoh guekcoj engq ndei,

Gohgi ndaej engq hwng,

Bak bi caiq daeuj daengz,

Ndaej fukhwng dahraix.