Ngoenzneix, gyoengqdou daeujdaengz ndoeng faex ndeu, gizneix nywj faex hoenghfwdfwd. Gizneix dwg aen dienhdangz doenghduz, haujlai doenghduz iq dwggyaez youh gyaeundei youq gizneix sengsanq. Miz duzlingz manz, duzloeg dwggyaez，noucoengz launyaenq, lijmiz diegnywj heuswdswd, faexgeq hung sang, engq miz huzraemx sawdikdik dem.

Gyoengqdou daeujdaengz dieg faexraeu mbaw hoengzfwdfwd ndeu. Seizcou daengz lo, raq rumz baed gvaq, mbawraeu hainduj menhmenh doek roengz- daeuj, diuzroen lajfaex couh lumj bu mbaw damj hoengz ndeu, caij hwnjbae yiengj “sasa”, ndeidingq raixcaix! Mwngz rox lwi？Doengh go faexraeu neix gaenq maj haujlai bi lo, dingjfaex gyaeuget couh lumj sausien bangj buhlengj, seizseiz angqcoux bouxhek daeujdaengz.

Ciep roengzdaeuj gyoengqdou daeujdaengz dieg loegvamoiz youq, loegvamoiz gizneix gyaeundei raixcaix, daegbied dwg gaeuloeg, yawj gaeuloeg gyaeundei de, caen lumj sanhhuz daejhaij, gak cungj gak yiengh, doengh duzloeg neix raen miz vunz daeuj, couh ceng gonq lau laeng gvaqdaeuj ra aeu gijgwn. Gou couh seizbienh gaem geij aen lauxbaegnding, gyoengqde couh humx gvaqdaeuj, lumjbaenz cingq naeuz：“Gou iek lo, gou nit lo, vaiq aeu laux- baegnding hawj gou ba!”

Gyoengqdou youh daeujdaengz henz huzraemx sawdik, huzraemx laj ndithaemh caen dwg gyaeundei lai lo, ndit ciuq gwnzraemx lumj miz caengz baengzsa saekgim ndeu, gwnzmbwn、gofaex ngaeuz dauqdingq youq gyang raemx, caen gyaeundei raixcaix. Seizneix, geij duz roegbit mbouj rox daj gizlawz okdaeuj, dwkvaih gingqraemx, najraemx baenz caengz baenz caengz engqgya hawj vunz gyaez lo.

Ha! Yawj ndoengfaex gyaeundei neix, de dwg gij laex daswyenz hawj vunz raeuz, raeuz aeu gyaez de、henhoh de ndei bae!

（Gyanghsuh Swngj Cizcouh Si Gai Sauvaz Siujyoz Maj Yezgiz）