(ciep geizgonq)

6 Doxdax

Seizneix gihgi caeuq nyaenma hainduj ciengz doxdax buek dailix ndeu lo. Ngamq hainduj, aen bya haenx lumj aen samgak hung ndeu, gwnz bya heuswdswd.

Diemj cung ndeu gvaqbae, aenvat daj gwnz bya vat bae haujlai namh, aen bya iq gaenq deng vat bae byongh ndeu, dingjbya soemsoem gaenq mbouj raen lo.

Baeznaengz gyoengq nyaenma vat ndaej lai di, gij sing yiengj dinghdingh danghdangh bienq iq, nyaenma sienseng couh naeuz: “Raeuz couh yaek baenzgoeng lo! Gou gamj haengjdingh!” Hoeng gvaqlaeng mbouj geijlai nanz, gij gihgi haenx youh daeuj daengz henzgyawj gyoengqde, gij sing gahcid gahcid fagcanj gihgai fatok haenx yied youq yied sang. Miz baez ndeu, youq mwh ndawde fag canj gihgai ndeu couh youq raeblaeng gyoengqde vat namh, gyoengqde cingqcaen yawjraen bak canj gimsug raeh de.

“Gaej dingz roengzdaeuj, gyoengq lwg dwggyaez gou!” Nyaenma sienseng baeghuhu naeuz, “gaej doeknaiq!”

“Gaej dingz roengzdaeuj!” Bozgizswh duz moubiz neix doiq Banghswh caeuq Bijwnh hemq naeuz, “seizneix raeuz seizlawz cungj aiq gaeb ndaej de!”

“Mwngz yawjraen de gvaq ma?” Bijwnh nyeux gyaeuj hemq naeuz.

“Caengz ne.” Bozgizswh haenqrengz gangj, “hoeng, gou siengj mwngz gaenq liz de gig gyawj lo!”

“Gou aeu yungh fag canj gou canj de hwnjdaeuj!” Banghswh hemq naeuz, “gou yaek faeg de baenz gaemz baenz gaemz bae!”

Hoeng daengz mwh gwn haeuxringz, aenvat lij vat dwk. Gyoengq nyaenma hojlienz goj lij buekmingh vat. Seizneix aen bya iq gaenq deng vat bae byongh lai lo, dan lw di namh ndeu lo.

Gyoengq bouxcawj ciengz dajciengx goj mbouj dingz roengzdaeuj gwnringz, gyoengqde vat haeujyinx lo, sij mbouj ndaej dingz roengzdaeuj.

“Vei, nyaenma sienseng!” Banghswh youq gwnz aenvat iet gyaeuj okdaeuj hemq naeuz, “dou couh yaek gaeb ndaej mwngz lo!”

“Mwngz baezlaeng couh mbouj miz banhfap caeg gaeq gwn lo!” Bozgizswh swenj, “mwngz gaej siengj dauqbae ciengzdajciengx gou loengh fangz lo!” Sam boux vunz cungj yienh’ok yiengh mbouj cingqciengz ndeu bae. Boux byom Bijwnh caeuq boux biz daemq Banghswh lumj fatbag nei hai aenvat, gya doh rengz, vaiq laebdaeb vat. Boux biz Bozgizswh lumj hozsiengh byaij roenhoj nei diuq bae diuq dauq, ndaw bak mbouj dingz saek di hemq dwk: “Roengzrengz! Roengzrengz!”

Daengz banringzgvaq 5 diemj, youq giz dieg gaeuq aen bya iq youq haenx miz aen gumz hung ndeu okdaeuj lo.

Aen gumz aenvat vat okdaeuj haenx couh lumj aen bak byafeiz ndeu. Neix caen dwg aen gingjgvanh geizheih hung ndeu, gij vunz ndaw mbanj seiqhenz baenz bang daeuj ngonzyawj. Gyoengqde ndwn youq henz bak gumzhung, yawj Bozgizswh、Banghswh caeuq Bijwnh youq lajde.

“Vei, Bozgizswh, sou guh gijmaz ne?”

“Dou cingq gaeb nyaenma!”

“Sou caen dwg fatbag!”

Gyoengqvunz riugae, riuhaha, hoeng neix dauq hawj sam boux de engqgya hozhwnj, engq ngwn, engq giendingh lo. Gaeb mbouj ndaej nyaenma, gyoengqde baenzlawz cungj mbouj dingz fwngz.