Ranzmbanj gou dwg aen mbanjbya iq ndeu youq Lozcwngz Mulaujcuz Swciyen, gizhaenx bya sang ndoeng mwn, va hom roeg lai, diegdieg cungj dwg gingjsaek ndei, hawj vunz sim sangj raixcaix.

Hoeng, seiziq gou lau dauq ranzcoj dangqmaz, aenvih roen dauq ranzcoj dwg roen heux bya ngutngut ngeungeu, aen ci hai daengz byonghbya, yawj bae dieggyae, yawjraen cungj dwg bya goengq dem goengq, yawj mbouj raen henz. Seiz mbouj seiz lij bungz raen dieg roengungj, daxboh hai ci menh dangqmaz, gou lijdwg roxnyinh bonjfaenh yaek deng vut ok rogcueng bae lo, doxgaiq ndaw dungx fan bae foek dauq, gou deng rueg yaek dai bae. Bae daengz gwnzhaw le, engq boihseiz lo, dou yaek gvaq diuz roennaez gumzgumz gamxgamx ndeu, aen ci iq daxboh hai haeuj mbanj mbouj ndaej. Seizneix, dou couh aeu aen ci dingz youq ranz beixnuengx gwnz haw gonq, caiq daj gwnzhaw co aen cibizgaj ndeu bae daengz mbanj. Roen haeuj mbanj gumzgamx mbouj bingz, gou ngunh ci lai, roxnyinh roen dauq ranzmbanj engq gyae lo.

Song bi gonq, gou youh gaen daxboh dauq ranzcoj baez moq. Bae gaxgonq gou couh miz di simnyap, roxnyinh bonjfaenh haengjdingh youh yaek ngunh ci. Naemj mbouj daengz, roen heux bya lijdwg roen heux bya, cix gvangq gvaq gaxgonq haujlai lo, dieg roengungj hix noix gvaq haujlai. Hawj vunz ceiq doeksaet dwg, diuz roennaez haeuj mbanj bienqbaenz diuz roensuijniz youh bingz youh gvangq ndeu, daxboh caiq hix mbouj yungh co cibizgaj lo, aen ci dou cigciep hai daengz bakdou ranz daxgoeng, gou roxnyinh ranzmbanj yaepyet gyawj lailai lo.

Daxgoeng naeuz, neix dwg guekgya bang raeuz guh, mboujdan roen bienq gvangq lo, ndwenngoenz hix bienq ndaej engq ndei lo. Daxgoeng naeuz, daengz bi 2023 byai, lij miz diuz gaudiet ndeu doeng daengz Vanzgyangh, daengz seizhaenx raeuz dauq ranzmbanj couh engq vaiq lo, ha, neix caen ndei lai lo! Muengh ranzmbanj gou yied ngoenz yied ndei!

（Nanzningz Si Roen Binhhuz Siujyoz Vujsieng Yaugih Vuz Vwnzcen）