(ciep geizgonq)

“Gawqyienz daihgya cungj doengzeiq,” Bijwnh hainduj faen hong, “Bozgizswh, mwngz youq gizneix caj, haeujsim gaej hawj nyaenma deuz. Gou caeuq Banghswh bae hai gihgi gvaqdaeuj. Nyaenma danghnaeuz siengj deuz ok rog daeuj, cigciep hai mbat cungq ndeu.”

Bijwnh byom sang youq doiqnaj byaij, Banghswh youh daemq youh biz youq raeblaeng niyeg’yeg cij gaen ndaej hwnj, Bozgizswh duz moubiz neix souj youq dieg gaeuq, aeu cungq doiq bakcongh nyaenma.

Mbouj yungh geijlai nanz, Bijwnh caeuq Banghswh gak boux gag hai aen dohlahgih hung baihnaj daiq fagcanj gihgai ndeu, hungz hungz hungz hai haeuj ndoengfaex lo. Song aen gihgi ndaem neix, yawj hwnjbae lumj aen doxgaiq gaj vunz, goj lumj song duz gvaiq gwn vunz.

“Ndei, hainduj!” Bijwnh haenqrengz hemq.

“Bae dai lo, nyaenma!” Banghswh swenj.

Dohlahgih hai doh rengz, yungh fagcanj gihgai daj gwnz aen bya iq vat baenz ndaek baenz ndaek namh roengzdaeuj, go faex hung bakcongh nyaenma sienseng haenx, ngaiz goenq, lumj diuz sihoj ndeu laemx roengzdaeuj lo. Yaepseiz, gwnzbya rin soiq lengqlengq mbin, gofaex laemx nyauznyauz, singcauz hawj vunz rwz yaek nuk.

Lajnamh, gyoengq nyaenma lutluj youq ndaw deihgoengq, dingq ndaej nyi gij singcauz hwkvunz baihgwnz cienz daeuj ——Bingh! Bingh! Hungh!

“Baihgwnz miz gijmaz saeh ne, daxboh?” Gyoengq lwg nyaenma haenqrengz cam, “gyoengqde naemj guh gijmaz?”

Nyaenma sienseng mbouj rox baihgwnz miz gijmaz saeh, goj mbouj rox sam boux vunz haenx naemj guh gijmaz.

“Dwg deihdoengh!” Maex nyaenma okrengz hemq coenz ndeu.

“Vaiq yawj!” Duz nyaenma lwg ndeu naeuz, “diuz deihgoengq raeuz bienq dinj lo, gou yawjraen rongh lo!”

Gyoengqde doxcaez yawj gvaq raeblaeng, caen bw, bak haeuj deihgoengq liz gyoengqde dan miz geij yinghcik gyae lo. Riengz giz rongh bakcongh yawj gvaqbae, gyoengqde yawjraen song aen gihgi ndaem hungloet haenx, gaenq yaek daengz gwnzgyaeuj gyoengqde lo.

“Dwg dohlahgih!” Nyaenma sienseng haenqrengz hemq, “lij daiq fagcanj gihgai dem! Vaiq vat congh deuz mingh! Vaiq!”