Hungzlingjginh dwg gij biu sausenh duiyenz, dwg gak vujsinghhungzgiz ndeu, dwg haujlai gwzming senhlez yungh lwed nyumx baenz. Bouxboux duiyenz cungj wnggai dawz de gyaez de, gyalai mingz- daeuz moq hawj de.

Mwh it nienzgaep, gou miz aen loqsiengj ndeu, couhdwg haeuj sausenh- dui ndaej dawz hungzlingjginh. Gvaq- laeng doenggvaq lai roengzrengz, gou dauqdaej ndaej dawz hungzlingjginh lo. Gou ndwn youq baihlaj geizguek sing hung gangj:“Seizseiz caepcawq vih gungcanj cujyi saehnieb bae buekguh！” Hoeng riengz seizgan menhmenh baenaj, gou roxnyinh baenz boux sausenh duiyenz bingzciengz raixcaix. Cigdaengz miz gienh saeh ndeu, youh dauqcungz hawj gou ndiepgyaez hungzlingjginh.

Haenx dwg mbat banringzgvaq nitfwdfwd、roengz fwnhung ndeu, dangzgoq ceiq doeklaeng dwg dangzgoq hozdung sausenhdui, lauxsae yiemzsuk caeuq dou naeuz：“Gyoengq doengzhag seizlawz cungj mbouj ndaej lumz bonjfaenh dwg boux sausenh duiyenz！”

“Dinglingling” sing lingz cuengqhag yiengj lo, caezgya laebdaeb byaij dauq ranz. Gou gang aen liengj iq daxmeh hawj gou haenx, couhsuenq gou gungjgwd roengzdaeuj hix ngamq cengqgengz ndoj ndaej fwn.

Gou boux dog byaij youq gwnz roen, sawqmwh miz aen ngaeuz ndeu daj gexhongh byaij okdaeuj, gou dingz roengzdaeuj yawj, yienzlaiz dwg boux doengzhag caemh ban Siujgangh, de mbouj dawz liengj, soemh fwnhung dauq ranz. Gou ngamq naemj bae bang, hoeng sawqmwh youh naemj daengz aen liengj bonjfaenh ngamq doh ndoj boux ndeu, danghnaeuz bang de, gou couh deng fwn rwed, gou hojguh lo, dauqdaej bang mbouj bang ne？

Sawqmwh, gou yawjraen mbaw hungzlingjginh najaek gou, de mbinfefe, gou youh naemj daengz coenz vah lauxsae:“Gyoengq doengzhag seizlawz cungj mbouj ndaej lumz bonjfaenh dwg boux sausenh duiyenz!” Guh boux sau- senh duiyenz, gou mbouj ndaej yawjraen mbouj guenj, gou buet gvaqbae, badmbaq Siujgangh, aeu aen liengj gang gvaq dingjgyaeuj de bae. De nyeux gyaeuj yawjyawj gou, gamjdoengh raixcaix, doeklaeng gou soengq de dauq ranz lo.

Yawj gij ngaeuzlaeng de dauq ranz, gou sim’angq raixcaix. Fwn dingz lo, henzmbwn miz diuz saihoengz ndeu, ndit ciuq youq gwnznaj gou, sojmiz cungj bienq ndaej raeujrub, hungzlingjginh najaek hix riengz rumz mbinfefe, lumj caeuq gou riu nei.

(Nanzningz Si Roen Binhhuz Siujyoz Vujsieng Yaugih Banh Hingz- dai)