Sanglinz Sanhgih Vahyenz dwg gizdieg ndei ndeu, gizhaenx gingjsaek gyaeundei, miz va miz nywj, miz byagyaj, lijmiz dingz iq, mwngz bae le itdingh mbouj siengj dauqma.

Daj bakdou gunghyenz yawj haeujbae, couh yawj raen miz haujlai faex. Miz go sang、 go daemq；go hung、go iq. Miz gorungz hung、goliux、gobek, lij- miz godauz……Gorungz hung heufwdfwd, lumj boux vunz ndeu iet hai song fwngz, coengh raeuz dangj rumzfwn, youh lumj aen liengj heuloeg ndeu. Roeg iq youq gwnz gorungz hung guh rongz, faeg lwg, ciengq go diuq foux, angqyangz raixcaix. Nye goliux unqnemnem duengq daengz gwnzdieg, lumj boux dahsau iq roi bwn’gyaeuj nei. Go’gvang maj ndaej gig sang, sang daengz gwnzmbwn bae lo, caeuq duzroeg fwjhau gwnzmbwn caez gaem fwngz dwk, gij mak de baenzroix baenzroix duengq roengzdaeuj, ndaetfwdfwd, aiq dwg saejdaeuz ndeigwn duz roeg iq ba?

Ndaw gunghyenz lijmiz haujlai va, miz vadaengngoenz, vadauz, lijmiz swjginghvah dem……Gova hoengzhoengz heuheu: Hoengz、 hau、henj、gyaemq……Duj dem duj riunyumnyum, gyaeundei raixcaix.

Raq rumz ci gvaqdaeuj, va hom raixcaix, lumj naeuz hom daengz ndawsim mwngz, hawj vunz cingsaenz gvaekgvaek, heiq hom yinx daeuj duz rwi iq, duz mbaj iq, duz non iq, duz rwi iq nyaengq aeu dangz, duz mbaj iq angq diuqfoux. Gij va gyaeundei hix yinx daeuj gyoengqvunz lo, gyoengqvunz youq gizhaenx yawj va, caeuq gova itheij ingjsiengq.

Byaij gvaq roen iq ngutngut ngeujngeuj, couh raen diuz giuzbumz ndeu, giuz dwg yungh faex hung guh saeu、lanzgan, lijmiz gepvax saekndaem, ndeiyawj raixcaix. Ndaw giuz miz eijraez，miz vunz naengh youq gwnzde yawj saw、yietnaiq、gangjgoj, lijmiz vunz youq gwnzgiuz lienhcau, dwk daigiz. Raq rumz ndeu ci daeuj roxnyinh liengzsisi.

Byaij gvaq giuzbumz couh raen benq diegnywj ndeu, diegnywj youh hung youh gvangq, go’nywj heufwdfwd, caij hwnjbae unqnemnem gig cwxcaih, lumj gaiq damj nei, gwnz diegnywj miz siuj- baengzyoux guhcaemz.

Sanglinz Sanhgih Vahyenz lijmiz haujlai gingj- saek ndeiyawj, gangj hix gangj mbouj caez, miz seizgan mwngz bae yawjyawj ba!

(Sanglinz Yen Dafungh Cin Cunghsinh Hagdangz seiq nienzgaep Cinz Cihsan boux lauxsae son’gyauq Mungz Cwngzgen)