Cungj dingq daxgoeng daxbuz naeuz, ndwenngoenz seizneix ngoenz ndei gvaq ngoenz lo. Hoeng gou itcig laihnaeuz, ndwenngoenz couhdwg lumj seizneix vuenyungz, cigdaengz miz ngoenz ndeu, gou mbouj siujsim fan geij mbaw siengq gaeuq henjrwd okdaeuj, yienghneix gaem mbaw siengq gaeuq bae hawj daxbuz lwnh gou saeh doenghbaez.

Daxbuz lumh doenghgij mbaw siengq gaeuq haenx, naeuz：“Seizhaenx, ndaw ranz mbouj miz reihnaz, ndwenngoenz gvaq hoj lai. Gaijfang gaxgonq, ciengzseiz gwn mbouj imq, doeklaeng gaijfang lo, raeuz faen ndaej reihnaz lo, ndwenngoenz ngoenz ndei gvaq ngoenz lo. 20 sigij 50 nienzdaih, daengx ranz dauqdaej ndaej gwn imq. 20 sigij 70 nienzdaih byai, raeuz ndaej youq ranzvax, aeu cienhoengz caep ciengz, aeu vax goemq dingj, ndei gvaq gaxgonq youq ranznaez ranzhaz lailai. Seizhaenx gyoengqvunz baenzranz cawx ‘sam gienh hung’ ceiq hwng dwg danci、aencibuh caeuq biuj. Daengz 20 sigij 90 nienzdaih, ndwenngoenz ndei lailai, daengx ranz raeuz haj vunz buen haeuj ranzlaeuz song fungh ding ndeu, ndaw ranz miz diengzhaex caeuq bakcauq, youq ndaej fuengbienh lo. Seizhaenx ‘sam gienh hung’ ceiq hwng bienqbaenz binghsieng、densi miz saek、cimozdoz.” Seizneix, daxboh byaij gvaqdaeuj ciengj naeuz：“Doeklaeng, miz mwngz lo, ndwenngoenz raeuz hix engqgya fouqmiz lo. ‘Sam gienh hung’ seizneix dwg soujgih、ci、ranzhung, caiqlij gyoengqde mboujduenh swnggaep vuenh daih, soujgih haeuj daengz seizdaih 5G, ci engqgya cinwngz, ranz hix bienq ndaej engq gvangqlangh ronghsag, bouxboux miz fungh rug bonjfaenh.” Gangj daengz neix, caezgya nyaenx mbouj ndaej naeuz, ndwenngoenz seizneix caen yied gvaq yied vuenyungz!

Raen caezgya yaenglwnh haenqrem, daxgoeng youq henz yawj bauqceij hix nyaenx mbouj ndaej duet gingqda roengzdaeuj, enj aek ndwn hwnjdaeuj, dawz mbaw yinhcangh “miznaj youq dangj 50 bi” okdaeuj， miznaj naeuz：“Doenghgij ndwenngoenz ndei neix dwg dangj raeuz daiqlingx beksingq buekguh okdaeuj！ Mbouj miz gungcanjdangj, couh mbouj miz Cungguek moq； mbouj miz gungcanjdangj couh mbouj miz ndwenngoenz vuenyungz ngoenzneix raeuz！” “Gyoengqsou aeu gyo’mbaiq dangj、dingq dangj gangj、riengz dangj byaij, hag ndeindei bae, roengzrengz guhhong, vih guekcoj mwnhoengh fouqmiz ok rengz bonjfaenh!”

(Nanzningz Si Roen Binhhuz Siujyoz Vangz Swjdungz)