(ciep geizgonq)

5 Aenvat Dwglau

Haet daihngeih, mwh daeng- ngoenz hwnj, Bozgizswh、Banghswh caeuq Bijwnh lij youq gizhaenx vat bw. Gyoengqde gaenq vat ok congh laeg hung lumj aen ranz ndeu, hoeng caengz vat daengz gyaeuj congh nyaenma. Gyoengqde boux- boux cungj baeg yaek dai, youh hozhwnj yaek dai.

“Raen fangz lo,” Bozgizswh naeuz, “aen banhfap yaezfod neix dwg byawz ok?”

“Bijwnh.” Banghswh naeuz.

Bozgizswh caeuq Banghswh da daengj yawj Bijwnh. Bijwnh youh ndoet gaemz laeuj makbingzgoj hung ndeu, hix mbouj nyiengh hawj song boux de, couh aeu aenbingz laeuj oet haeuj ndaw daeh bae lo. “Dingq youq,” de hozhwnj naeuz, “gou aeu gaeb ndaej duz nyaenma haenx! Mbouj aeu de dak hoij youq laj roqranz najdou gou ndengj dai, gou guhlawz cungj mbouj dingz fwngz!”

“Raeuz dan baenzneix vat haengjdingh gaeb mbouj ndaej de,” Bozgizswh duz moubiz neix naeuz, “gou caen vat doh lo.”

Banghswh daemqdet dungx bongz ngiengx gyaeuj yawjyawj Bijwnh, cam: “Mwngz lij miz gijmaz banhfap yaezfod?”

“Mwngz gangj gijmaz?” Bijwnh naeuz, “gou dingq mbouj ndaej nyi.” Bijwnh caengz swiq ndang gvaq, de goj mbouj swiq naj caeuq gyaeuj gvaq. Ndaw rwz de cungj dwg haex rwz、ngaeh、dangzhombak、nengzdai doenghgij doxgaiq ngaihngad neix, ndigah de dingq mbouj ndaej nyi bouxwnq gangjvah. “Haenqrengz gangj.” De doiq Banghswh naeuz. Banghswh mbouj miz banhfap, youh okrengz doiq de hemq naeuz: “Lij miz gijmaz banhfap engq yaez?”

Bijwnh yungh niux fwngz ngaihngadngad ndeu gvaxgvax aen hoz, gwnzde giz ok nong humz mbouj dingz. “Guh cungj hong neix ni.” De naeuz:“Raeuz aeu miz gihgi——fagcanj gihgai. Yungh fagcanj gihgai, dan aeu haj faencung, raeuz couh vat ndaej de okdaeuj.”

Aen banhfap neix caen baenz bw. Couhdwg Bozgizswh caeuq Banghswh goj nyinh, neix dwg aen banhfap ndei ndeu.