Bouxboux cungj miz aen liengj bonjfaenh, gou hix miz aen liengj ndeu.

Seizfwn ciengzseiz fwn doek, ndigah gou bwh ndei aen liengj. Ngoenzhaenx, cuengqhag lo, baihrog doek fwnhung, lumj buet, lumj ndingq, doeksasa. Gou gang aen liengj, byaij ok gyausiz, byaij ok ndawhag, fwn yaek rwed gou, hoeng youh deng aen liengj gou dangj dwk. Gyoengqde doek daengz najliengj, miz sing sasa, fwngz gou gaem ganjliengj, roxnyinh aen liengj saenqdoengh, haenx dwg fwn doek roengzdaeuj cauh baenz, saenqdoengh couh lumj sing hemq aen liengj cingq hoenx vunzdig. Raemxfwn daj najliengj lae roengzdaeuj, baenz roix baenz roix.

Haujlai raemxfwn daj gyangmbwn doek roengz- daeuj, aen biengz bienq ndaej hausagsag. Deng doenghgij raemxfwn neix rwed, aen liengj gou baezbaez cungj baujhoh gou, mbouj hawj ndang gou deng fwn rwed.

Gou dauqdaej dauq daengz ranz, yawjyawj aen liengj gaenq dumz liux. Gou naemj: Naed fwn doek roengzdaeuj, de nanzdauh mbouj rox in lwi? Raemx- fwn rwed daengx ndang liux, de nanzdauh mbouj rox nit lwi? De gizsaed rox in, rox nit, cix vih gou, de in, de nit, hoeng de mbouj miz saek coenz vah’ienq, cijdwg laeglemx bang gou dangj fwn.

Gou sawqmwh naemj daengz ndaw ndwenngoenz gou, hix miz haujlai vunz miz gij cingsaenz lumj aen liengj ityiengh sijndaej vih bouxwnq、laeglemx okrengz. Gou lumjbaenz yawjraen bouxguhhong buen cien youq laj daengngoenz nditndak hanh laesagsag, bouxbaethaw youq ngoenz fwnmoenq gungj hwet baet gai, daxmeh roengzban le ciep gou dauq ranz, daxboh baegfofo lij cawj haeux hawj gou, lauxsae yienznaeuz hoz hep lij youq gwnz gangjdaiz hwnjdangz……Gwnz seiqgyaiq doenghgij vunz ndaej daiq raeujrub hawj vunz, gyoengqde mbouj dwg gij vaqndang aen liengj ma?

Aen liengj, gou gyaez mwngz, engq gingqgyaez gyoengqvunz henzgyawj lumj aen liengj nei laeglemx okrengz, boiqfug gyoengqde binjgwz fouzsei.

(Bwzswz Si Yougyangh Gih Yizfuh Siujyoz Maj Youhyenz)