(ciep geizgonq)

4 Fagso Dwglau

Youq ndaw congh lajnamh, maex nyaenma doq sijsaeq riz gyaeuj goenq diuzrieng nyaenma sienseng, doq sim- in naeuz:“Diuzrieng ceiq gyaeundei ndaw fanghyenz geij yinghleix couh baenzneix mbouj miz lo.”

“Cip yaek dai.” Nyaenma sien- seng naeuz.

“Rox mwngz cip, gvan ndei gou, hoeng gig vaiq couh ndei dauq lo.”

“De mbouj geijlai nanz couh yaek maj dauq ndei, daxboh.” Duz nyaenma lwg ndeu naeuz.

“De maj okdaeuj mbouj ndaej dauq lo,” nyaenma sienseng naeuz, “daj neix gvaqlaeng, gou mbouj miz rieng lo.” Nyaenma sienseng simnyap raixcaix.

Haemhhaenx, nyaenma daengx ranz cungj dungx iek liux lo. Gyoengq lwg senqsi couh ninz lo, maex nyaenma goj suiz lo. Hoeng rieng goenq cip dwk nyaenma sienseng ninz mbouj ndaej. “Ai!” De gag siengj, “gou yawj, baezneix ndaej lix roengzdaeuj, couh gaenq caijsoq ndei dangqmaz lo. Seizneix bakcongh gaenq deng gyoengqde ra raen, raeuz daj neix couh yaek mbouj ndaej an- onj gvaq ndwenngoenz lo, aeu beuj ranz vaiq di, mboujne……Haenx dwg sing maz?” De gingjgaeh ngeng rwz sijsaeq dingq——Dwg fagso! Dwg gij sing yiengjcaca seiz fagso vat namh fat okdaeuj! Neix caen dwg gij sing ceiq dwglau ndaw daengx ciuh nyaenma!

“Ndiu hwnq ndiu hwnq!” De okrengz hemq, “gyoengqde naemj vat raeuz okbae!”

Maex nyaenma yaepyet couh doeksaet ndiu hwnq lo, de naengh hwnjdaeuj, lau dwg daengx ndang saenz liux. De yomjyomj cam nyaenma sienseng: “Mwngz doekdingh haenx dwg gij sing gyoengqde?”

“Gou doekdingh! Dingq!”

“Gyoengqde naemj gaj gyoengq lwg raeuz!” Maex nyaenma daej lo.

“Gaej naemj!” Nyaenma sien- seng naeuz.

“Gyoengqde haengjdingh, gvan ndei gou!” Maex nyaenma sienseng daejfetfet, “mwngz rox gyoengqde siengj baenzneix guh.”

Caca, caca, caca, fagso youq gwnz gyaeuj gyoengqde vat mbouj dingz, rin iq、namh mienz hainduj daj dingj gyaeuj doek roengzdaeuj.

“Gyoengqde naemj baenzlawz gaj dai raeuz, daxmeh?” Duz nyaenma lwg ndeu cam. Song aen da ndaem mwnzmwnz de haenx, aenvih lau byaengq ndaej hunghung, “miz ma mbouj?”