Geij ngoenz gonq, mwh gou cuengqhag dauqranz, daxdaiq naj riunyumnyum cam gou：“Rox gou ngoenzneix guhmaz lwi？” Gou hemq naeuz：“Dangyienz dwg bae dwk cimyawhfuengz law!” Daxdaiq sim- angq dangqmaz naeuz：“Caen dwg lwg cinglingz.” Naeuz daengz daxdaiq gou dwk cimyawhfuengz gienh saeh neix, caen dwg mbouj swnhleih geijlai ha.

Geij ndwen gonq, bouxlaux hix ndaej dwk cimyawhfuengz lo. Daxdaiq naemj bae dangqmaz, hoeng ga daxdaiq mbouj ndei, daxboh daxmeh nyaengq hong, mbouj ndaej bae soengq de. Naemj mbouj daengz, ndwengonq bouxguhhong segih gingqyienz gag dwk dienhvah hawj daxdaiq, cam：“Bouxlaux dwk cimyawhfuengz caengz?” Daxdaiq naeuz：“Dieg dwk cim gyae lai, vunzlaux ga byaij mbouj ndaej, gou caengz bae dwk.” “Seizneix ndaej daeuj dwk lo, dou miz ci cienmonz ciep soengq ne! Hab diuzgienh dwk cimyawhfuengz, segih raeuz mbouj ndaej noix saek boux!” Daxdaiq youh doeksaet youh angqyangz. Hoeng guh genjcaz le yawjraen, hezyaz daxdaiq sang lai, dwk cimyawhfuengz mbouj ndaej. Bouxguhhong nai de naeuz：“Mbouj youqgaenj, raeuz caj geij ngoenz.” Gvaq geij ngoenz le, bouxguhhong segih youh dwk dienhvah daeuj cam ndang daxdaiq baenzlawz yiengh, lij lwnh daxdaiq henzgyawj ranz dou miz dieg laemzseiz dwk cimyawhfuengz. Baezneix fuengbienh lo, baezneix, daxdaiq dauqdaej dwk ndaej cimyawhfuengz lo, sim’angq dangqmaz.

Seizneix baezbaez naemj daengz gienh saeh neix, daxdaiq cungj gikdoengh raixcaix naeuz:“Gyo’mbaiq dangj! Gyo- mbaiq guekgya！ Hawj gyoengq vunzlaux byaij mbouj ndaej neix cungj ndaej bae dwk cim- yawhfuengz.” Gou naemj, guekgya gyaez raeuz, couhdwg mbouj vut saek boux, mbouj hawj noix saek boux!

(Nanzningz Si Dasah- denz Siujyoz Vangz Swjhungz)